سعودی عرب میں بدعنوان عناصر کے خلاف کارروائیوں کے دوران گرفتاریاں عمل میں لائی گئی ہیں۔
سعودی عرب کی انسدادِ بدعنوانی اتھارٹی نے فروری 2026 کے دوران متعدد فوجداری اور انتظامی مقدمات کی تحقیقات شروع کیں، جو سرکاری اداروں میں شفافیت کے فروغ اور بدعنوانی کے انسداد کی جاری مہم کا حصہ ہیں۔
اتھارٹی نے اتوار کے روز جاری بیان میں بتایا کہ 349 سرکاری ملازمین سے تحقیقات کی گئیں جبکہ 78 افراد کو بدعنوانی کے الزامات پر گرفتار کیا گیا، جن میں سے بعض کو ضمانت پر رہا کر دیا گیا۔
ادارے کے مطابق گزشتہ ماہ مجموعی طور پر 3164 نگرانی دورے بھی کیے گئے۔
بیان کے مطابق ملزمان اور گرفتار افراد کا تعلق وزارتِ داخلہ، وزارتِ دفاع، وزارتِ بلدیات و دیہی امور و ہاؤسنگ، وزارتِ صحت اور وزارتِ انسانی وسائل وسماجی ترقی سے ہے۔ ان پر رشوت ستانی اور اختیارات کے ناجائز استعمال جیسے الزامات عائد کیے گئے ہیں۔
