امریکا کی ریاست فلوریڈا میں اسپیس ایکس کے راکٹ لانچ کے بعد آسمان پر جیلی فِش سے مشابہ ایک حیرت انگیز روشن منظر دکھائی دیا جس نے دیکھنے والوں کو حیران کردیا۔
اسپیس کوسٹ کے فوٹوگرافروں نے راکٹ کی پرواز کے چند منٹ بعد آسمان میں پھیلتے ہوئے روشن بادل نما منظر کو کیمرے میں محفوظ کیا، جو قبل از سحر آسمان میں نمایاں طور پر دکھائی دے رہا تھا۔
یہ بھی پڑھیں: چاند کی سطح پر پھیلی پراسرار روشنیاں
فالکن 9 راکٹ کو بدھ 4 مارچ کو صبح 5:52 پر کیپ کینیورل اسپیس فورس اسٹیشن سے اسٹارلنک 10-40 مشن کے تحت لانچ کیا گیا۔ راکٹ کے اخراج سے بننے والا روشن دھوئیں کا بادل سورج کی روشنی پڑنے سے چمک اٹھا اور آسمان میں جیلی فِش جیسی شکل اختیار کر گیا۔
ماہرین کے مطابق اس منفرد منظر کو اسپیس جیلی فِش کہا جاتا ہے۔ ماہرِ موسمیات بروکس گارنر کے مطابق یہ مظہر اس وقت پیدا ہوتا ہے جب فضا کی بالائی سطح پر موجود سورج کی روشنی راکٹ کے اخراجی دھوئیں سے منعکس ہوتی ہے۔
یہ بھی پڑھیں: بین الاقوامی خلائی اسٹیشن: مدار میں 25 سال، جانیے دلچسپ معلومات
یہ روشن اثر فلوریڈا کے علاوہ امریکی ریاست جارجیا اور شمال مشرقی ساحلی علاقوں تک بھی دیکھا گیا، جہاں شہریوں نے سوشل میڈیا پر اس غیر معمولی منظر کی تصاویر اور ویڈیوز شیئر کیں۔
