متحدہ عرب امارات نے دعویٰ کیا ہے کہ اس نے ایران کی جانب سے داغے گئے متعدد میزائلوں اور ڈرونز کو فضائی دفاعی نظام کے ذریعے فضا میں ہی تباہ کر دیا۔
اماراتی وزارت دفاع کے مطابق فضائی دفاعی نظام نے 9 بیلسٹک میزائل اور 109 ڈرونز کو روک کر تباہ کیا، جبکہ 3 ڈرون اماراتی حدود کے اندر گرے۔
یہ بھی پڑھیں: امریکا نے کویت میں سفارتی سرگرمیاں معطل کر دیں، صدر ٹرمپ کا آئندہ ایرانی قیادت کے انتخاب میں کردار ادا کرنے کا اعلان
حکام کے مطابق مجموعی طور پر 112 ڈرونز کی نشاندہی کی گئی تھی، جن میں سے 109 کو فضا میں ہی مار گرایا گیا، جبکہ 3 ڈرونز کے اماراتی سرزمین پر گرنے کی تصدیق ہوئی۔
وزارت دفاع کا کہنا ہے کہ ایرانی حملوں کے آغاز سے اب تک مجموعی طور پر 205 بیلسٹک میزائلوں کی نشاندہی کی گئی۔ ان میں سے 190 میزائل اماراتی دفاعی نظام نے تباہ کر دیے، جبکہ 13 میزائل سمندر میں اور 2 اماراتی حدود میں گرے۔
یہ بھی پڑھیں: امریکا کا مشرقِ وسطیٰ میں یکطرفہ حملہ آور ڈرون فورس تعینات کرنے کا اعلان
بیان کے مطابق اب تک 1184 ایرانی ڈرونز کی نشاندہی کی جا چکی ہے جن میں سے 1110 ڈرونز کو فضائی دفاعی نظام نے تباہ کیا، جبکہ 74 ڈرون اماراتی علاقوں میں گرے۔ اس کے علاوہ 8 کروز میزائل بھی نشانہ بنا کر تباہ کیے گئے۔
اماراتی وزارت دفاع کے مطابق حملوں کے نتیجے میں پاکستان، نیپال اور بنگلادیش کے 3 شہری جاں بحق ہوئے جبکہ مختلف قومیتوں کے 112 افراد معمولی زخمی ہوئے۔
