یوم یتامیٰ کے موقع پر ایوان صدر میں یتیم بچوں کے اعزاز میں افطار ڈنر کی تقریب منعقد ہوئی جس میں صدر مملکت آصف علی زرداری نے شرکت کی اور بچوں سے ملاقات کی۔
صدر آصف علی زرداری نے کہاکہ ایوان صدر آپ کا اپنا گھر ہے اور بچوں سے مل کر خوشی ہوئی۔ انہوں نے یتیم بچوں کے بہتر مستقبل کے لیے کیے جانے والے اقدامات کی تعریف کی اور کہا کہ یہ بچے پاکستان کا روشن مستقبل ہیں۔
صدر مملکت نے اس موقع پر معاشرے کے ہر فرد پر زور دیا کہ یتیم بچوں کی کفالت، تعلیم اور تربیت ہر کسی کی ذمہ داری ہے۔
انہوں نے کہا کہ حکومت اور متعلقہ ادارے بچوں کی تعلیم و تربیت اور روشن مستقبل کے لیے مسلسل کام کرتے رہیں گے۔
صدر آصف علی زرداری نے آنے والے دور میں جدید ٹیکنالوجی کی اہمیت پر بھی روشنی ڈالی اور کہا کہ نوجوان اور بچے ملک کی ترقی میں کلیدی کردار ادا کریں گے۔
تقریب کے دوران صدر مملکت نے یتیم بچوں میں تحائف بھی تقسیم کیے، اور افطار ڈنر کے موقع پر بچوں کے لیے خوشگوار ماحول فراہم کیا گیا۔
