عید کی خریداری کے پیش نظر اسلام آباد پولیس نے شہر کی مارکیٹس اور تجارتی مراکز میں فول پروف سکیورٹی انتظامات کر دیے ہیں۔
یہ بھی پڑھیں: اسلام آباد کے نواحی علاقے میں جدید ٹیلی میڈیسن سینٹر کا افتتاح
شہریوں کی سہولت اور حفاظت کو یقینی بنانے کے لیے ایک ہزار سے زائد افسران اور جوان مختلف بازاروں اور شاپنگ سینٹرز میں تعینات کیے گئے ہیں۔
ڈی آئی جی اسلام آباد محمد جواد طارق کے مطابق عید شاپنگ کے دوران رش کے پیش نظر مارکیٹس میں پولیس کی اضافی نفری تعینات کر دی گئی ہے جبکہ شہریوں کے تحفظ کے لیے پیدل گشت اور ڈولفن فورس کی پٹرولنگ میں بھی اضافہ کر دیا گیا ہے۔
انہوں نے بتایا کہ خواتین کو محفوظ ماحول فراہم کرنے کے لیے اہم مارکیٹس میں لیڈیز پولیس افسران بھی تعینات کی گئی ہیں تاکہ خواتین خریداروں کو کسی قسم کی پریشانی کا سامنا نہ کرنا پڑے۔
مزید پڑھیے: موٹر سائیکل واش کرائی تو ایم ٹیگ اتر گیا، اب اس کا کیا حل ہے؟ شہری کی شکایت
ڈی آئی جی کے مطابق ٹریفک کی روانی برقرار رکھنے کے لیے ٹریفک پولیس کے افسران اہم شاہراہوں اور مصروف مارکیٹس میں موجود رہیں گے تاکہ گاڑیوں کی آمدورفت کو بہتر طریقے سے منظم کیا جا سکے۔
انہوں نے مزید کہا کہ سیف سٹی کیمروں کے ذریعے مارکیٹس اور تجارتی مراکز کی مسلسل نگرانی کی جا رہی ہے جبکہ تمام سینئر پولیس افسران سکیورٹی انتظامات کی خود نگرانی کریں گے۔
محمد جواد طارق کا کہنا تھا کہ اسلام آباد پولیس عید خریداری کے دوران شہریوں کو محفوظ ماحول فراہم کرنے کے لیے پوری طرح پرعزم ہے اور شہریوں کے جان و مال کا تحفظ پولیس کی اولین ترجیح ہے۔
مزید پڑھیں: اسلام آباد کے تعلیمی اداروں میں موسم بہار کی چھٹیوں کا اعلان کردیا گیا، نوٹیفکیشن جاری
انہوں نے شہریوں سے اپیل کی کہ مارکیٹس میں موجود پیشہ ور بھکاریوں کی حوصلہ شکنی کریں اور کسی بھی مشکوک سرگرمی کی صورت میں فوری طور پر پولیس کو اطلاع دیں۔
