خیبرپختونخوا کے بالائی علاقوں میں گلیشیائی جھیل پھٹنے کے خطرے کے پیش نظر پی ڈی ایم اے نے الرٹ جاری کردیا۔
پی ڈی ایم اے نے چترال اپر، چترال لوئر، دیر اپر، سوات اور اپر کوہستان کی ضلعی انتظامیہ کو پیشگی اقدامات کرنے کی ہدایت کی ہے۔ 10 سے 12 مارچ کے دوران متوقع بارشوں اور درجہ حرارت میں غیر معمولی اضافے کے باعث گلیشیائی جھیلوں کے پھٹنے اور فلیش فلڈ کے امکانات بڑھ گئے ہیں۔
ضلعی انتظامیہ کو حساس مقامات کی مسلسل نگرانی، خطرے سے دوچار آبادی کو پیشگی آگاہی، اور محفوظ مقامات کی نشاندہی کرنے کی ہدایت دی گئی ہے۔
اس کے علاوہ ریسکیو اور ایمرجنسی سروسز کو بھی الرٹ رکھنے کی ہدایت جاری کی گئی ہے۔
پی ڈی ایم اے نے سیاحوں اور مسافروں کو خطرناک علاقوں میں غیر ضروری سفر سے گریز کرنے کی تلقین کی ہے جبکہ نشیبی علاقوں میں رہنے والے افراد کو احتیاطی تدابیر اختیار کرنے کی ہدایت دی گئی ہے۔
یاد رہے کہ پی ڈی ایم اے کی جانب سے 9 سے 12 مارچ کے دوران گرج چمک کے ساتھ بارش اور میدانی علاقوں میں درجہ حرارت میں اضافہ کے پیش نظر الرٹ پہلے ہی جاری کیا جا چکا تھا۔
پی ڈی ایم اے کا ایمرجنسی آپریشن سینٹر مکمل طور پر فعال ہے اور عوام سے کہا گیا ہے کہ کسی بھی ہنگامی صورتحال کی صورت میں ہیلپ لائن 1700 پر رابطہ کریں۔
