وزیرِاعظم شہباز شریف نے اعلان کیا ہے کہ عالمی منڈی میں تیل کی قیمتوں میں اضافے کے باوجود اس مرتبہ عوام سے کیے گئے وعدے کے مطابق پیٹرولیم مصنوعات کی قیمتیں نہیں بڑھائی جائیں گی۔ وزیرِ اعظم نے کہا کہ یہ فیصلہ عام آدمی پر بوجھ کم کرنے اور مشکل حالات میں عوام کو ریلیف پہنچانے کے لیے کیا گیا ہے۔
یہ بھی پڑھیں: پیٹرول بچاؤ، الیکٹرک بائیکس چلاؤ: حکومت بلوچستان کی الیکٹرک بائیکس اسکیم سے بائیکس کیسے حاصل کی جا سکتی ہیں؟
وزیرِ اعظم سے جاری بیان میں کہا گیا ہے کہ خطے میں کشیدگی کی وجہ سے عالمی معیشت دباؤ میں ہے اور اس کے پاکستان کی معیشت پر گہرے اثرات مرتب ہونے کا خدشہ ہے۔ تاہم بروقت پالیسی سازی، حکومت کی جانب سے بچت کے اقدامات اور مالی نظم و ضبط کے باعث اس صورتحال سے احسن طور پر نمٹنے کی کوشش کی جا رہی ہے۔
انہوں نے کہا کہ بطور خادم پاکستان، ان مشکل حالات میں غریب آدمی پر بوجھ کم کرنے کے لیے حکومت اور ملک کی اشرافیہ سے شروعات کرنے کا عزم کیا ہے۔ وفاقی حکومت کے اقدامات میں صوبائی حکومتیں بھی بھرپور تعاون فراہم کر رہی ہیں جو خوش آئند ہے۔
یہ بھی پڑھیں: پیٹرولیم مصنوعات کی قیمتوں میں ردوبدل کا فیصلہ کل ہوگا
وزیرِ اعظم نے مزید کہا کہ اللہ کے فضل و کرم سے خام تیل ملکی ضروریات کے لیے مناسب مقدار میں دستیاب ہے اور وفاقی و صوبائی حکومتیں مل کر کسی کو بھی مقررہ قیمت سے زائد وصولی سے روک رہی ہیں۔ انہوں نے دعا کی کہ عالمی سطح پر حالات بہتر ہوں اور پیٹرولیم مصنوعات کی قیمتوں میں استحکام آئے۔
