پاکستان کرکٹ بورڈ (پی سی بی) کی سلیکشن کمیٹی نے کہا ہے کہ قومی ٹیم شائقین کو معیاری کرکٹ پیش کرنے کے لیے پرعزم ہے اور مستقبل کے فیصلے کوچ کے ساتھ مشاورت کے بعد کیے جائیں گے۔
سلیکشن کمیٹی کے اراکین عاقب جاوید، مصباح الحق، سرفراز احمد اور اسد شفیق نے مشترکہ پریس کانفرنس میں بتایا کہ ٹیم کی کارکردگی میں بہتری کے لیے ہر قدم سوچ سمجھ کر اٹھایا جائے گا اور کھلاڑیوں کے انتخاب میں مناسب توازن برقرار رکھا جائے گا۔
یہ بھی پڑھیے: پی سی بی کا زمبابوین کرکٹر بلیسنگ موزاربانی کے خلاف قانونی ایکشن کا فیصلہ
عاقب جاوید نے کہا کہ پاکستان میں کرکٹ کی محبت بہت زیادہ ہے، تاہم گزشتہ ورلڈ کپ کے نتائج توقعات کے مطابق نہیں رہے۔ انہوں نے کہا کہ کھلاڑی امیدوں پر پورا نہیں اترے اور ایسا محسوس ہوا تھا کہ ٹیم سیمی فائنل تک جائے گی، لیکن ایسا ممکن نہیں ہو سکا۔
انہوں نے مزید وضاحت کی کہ ہر 6 ماہ بعد ٹیم میں نئے کھلاڑی شامل کرنا عملی طور پر ممکن نہیں، اور ٹیم کی بہتری کے لیے طویل مدتی منصوبہ بندی ضروری ہے۔
اس سے قبل پی سی بی کے چیئرمین محسن نقوی نے سلیکشن کمیٹی کے اراکین مصباح الحق، سرفراز احمد، اسد شفیق اور عاقب جاوید سے ملاقات کی اور انہیں اپنے فرائض بغیر کسی دباؤ کے ایمانداری سے سرانجام دینے کی ہدایت دی۔
لاہور: چیئرمین پاکستان کرکٹ بورڈ محسن نقوی سے سلیکشن کمیٹی کے ممبران کی ملاقات
چیئرمین پی سی بی محسن نقوی کا سلیکشن کمیٹی کو مکمل فری ہینڈ کا استعمال کرنے کا مشورہ
بغیر کسی دباؤ کے ایمانداری سے فرائض سرانجام دیں، محسن نقوی
کسی کی تنقید برائے تنقید کی پرواہ نہ کریں، محسن نقوی… pic.twitter.com/dj9mnIbheZ
— Pakistan Cricket (@TheRealPCB) March 14, 2026
محسن نقوی نے کہا کہ کمیٹی کو کسی کی تنقید برائے تنقید کی پرواہ نہیں کرنی چاہیے اور وہ تمام فیصلے آزادانہ اور مکمل شفافیت کے ساتھ کرے۔ انہوں نے کمیٹی کے ممبران کو یقین دہانی کرائی کہ ان کی مکمل حمایت ہمیشہ ان کے ساتھ ہے۔
سلیکشن کمیٹی کے اراکین نے چیئرمین کی بھرپور اعتماد اور تعاون پر شکریہ ادا کیا اور کہا کہ وہ ٹیم کے بہترین مفاد میں ایمانداری اور پیشہ ورانہ انداز میں فیصلے کریں گے۔
