بالی ووڈ کی معروف اداکارہ ہیما مالنی نے آسکرز کی تقریب میں خراجِ عقیدت کے حصے میں لیجنڈری بھارتی اداکار دھرمیندر کا نام شامل نہ کیے جانے پر مایوسی کا اظہار کیا ہے۔
یہ بھی پڑھیں: سوتیلے بیٹوں سنی اور بوبی دیول سے اختلافات کی خبروں پر ہیما مالنی کا ایک بار پھر تبصرہ
ہیما مالنی نے ہندوستان ٹائمز سے گفتگو کرتے ہوئے کہا کہ ذاتی طور پر دھرمیندر کو ایسی باتوں کی کبھی پروا نہیں رہی، کیونکہ مداحوں کی محبت ہی ان کے لیے سب سے بڑی عزت تھی۔ انہوں نے کہا کہ لوگوں کی جانب سے آج بھی دھرمیندر کو یاد کرنا اور ان سے محبت کا اظہار کرنا ان کے خاندان کے لیے بہت معنی رکھتا ہے۔
انہوں نے مزید کہا کہ آسکرز کو یقینی طور پر دھرمیندر کا نام خراجِ عقیدت کی فہرست میں شامل کرنا چاہیے تھا۔
رپورٹس کے مطابق بعد ازاں دھرمیندر اور دیگر بھارتی شخصیات کے نام ویب سائٹ پر شامل کر دیے گئے، تاہم اسے تاخیر سے ملنے والی پہچان قرار دیا جا رہا ہے۔ فہرست میں منوج کمار، سروجہ دیوی اور کوٹا سرینواس راؤ کے نام بھی شامل کیے گئے۔
یہ بھی پڑھیں: دھرمیندر کا آخری پیغام، سنی دیول نے والد کی جذباتی ویڈیو شیئر کردی
دھرمیندر، جنہوں نے چھ دہائیوں سے زائد طویل کیریئر میں تقریبا 300 فلموں میں کام کیا، نومبر 2025 میں 89 برس کی عمر میں انتقال کر گئے تھے۔ بالی ووڈ میں بھارت کمار کے نام سے مشہور منوج کمار اپریل 2025 میں 87 برس کی عمر میں دل کے عارضے کے باعث انتقال کر گئے تھے۔
جنوبی بھارتی اداکارہ سروجہ دیوی، جنہوں نے کنڑ، ہندی، تامل اور تیلگو فلموں میں 200 سے زائد فلموں میں اداکاری کی، جولائی 2025 میں 87 برس کی عمر میں وفات پا گئیں، جبکہ تیلگو اداکار اور سابق سیاست دان کوٹا سرینواس راؤ بھی طویل علالت کے بعد جولائی 2025 میں 83 برس کی عمر میں انتقال کر گئے تھے۔
