آئی سی سی ٹی20 ورلڈ کپ میں مایوس کن کارکردگی اور حالیہ ایک روزہ سیریز میں بنگلہ دیش کے ہاتھوں شکست کے بعد سابق کپتان قومی کرکٹ ٹیم شاہد آفریدی نے سلیکشن کمیٹی کو تنقید کا نشانہ بنایا ہے۔
سماجی رابطے کی ویب سائٹ ایکس پر اپنے بیان میں شاہد آفریدی نے کہا کہ سلیکشن کمیٹی میں شامل افراد نے خود بھی کافی کرکٹ کھیلی ہے، لیکن اس کے باوجود یہ فیصلہ کرنے میں ناکام دکھائی دیتے ہیں کہ کس کھلاڑی کو کس طرز کی کرکٹ میں قیادت سونپی جانی چاہیے۔
— Shahid Afridi (@SAfridiOfficial) March 15, 2026
ان کا کہنا تھا کہ ٹی20 مقابلوں کی کارکردگی کو بنیاد بنا کر ایک روزہ کرکٹ کے تجربہ کار کھلاڑیوں کو ٹیم سے باہر کرنا سمجھ سے بالاتر ہے۔
شاہد آفریدی کے مطابق اصلاحات کے نام پر کم تجربہ رکھنے والے نوجوان کھلاڑیوں کو نہ صرف ٹیم میں شامل کیا جا رہا ہے بلکہ انہیں قومی ٹیم کی نمائندگی کا موقع بھی جلدی دیا جا رہا ہے۔
انہوں نے مزید کہاکہ ایسے کھلاڑیوں کو منتخب کیا جا رہا ہے جنہوں نے فرسٹ کلاس کرکٹ میں چند ہی میچ کھیلے ہیں، جبکہ ملکی ڈومیسٹک کرکٹ کا معیار بھی ایسا نہیں کہ وہاں سے مسلسل ایسے کھلاڑی سامنے آ سکیں جو فوری طور پر قومی ٹیم میں جگہ بنانے کے قابل ہوں۔
شاہد آفریدی نے طنزیہ انداز میں کہاکہ اگر سرجری کی ضرورت ہے تو وہ ٹیم کی نہیں بلکہ سلیکشن کمیٹی کی ہونی چاہیے۔
واضح رہے کہ یہ ردعمل اس وقت سامنے آیا جب قومی کرکٹ ٹیم کو حال ہی میں بنگلہ دیش کے خلاف ایک روزہ سیریز میں ایک کے مقابلے میں 2 میچوں سے شکست کا سامنا کرنا پڑا۔
