پشاور کے سب سے بڑے افطار دسترخوان کا مینیو: مچھلی، چھوٹا گوشت، پلاؤ، مگر یہ سب ممکن کیسے ہوتا ہے؟

خیبرپختونخوا کے دارالحکومت پشاور میں فکس ایٹ کی جانب سے افطار بکس سے شروع ہونے والا افطار دسترخوان اب پشاور کا سب سے بڑا افطار دسترخوان بن گیا ہے، جہاں منتظمین کے مطابق روزانہ ہزاروں افراد افطاری کرتے ہیں۔

پشاور کے صدر اسٹیڈیم چوک پر لگنے والے اس افطار دسترخوان کا مینیو ہر روز مختلف ہوتا ہے، جو کسی بڑے ہوٹل کے مینیو سے کم نہیں۔

افطار دسترخوان میں مختلف اقسام کے پھل اور پکوڑے تو ہوتے ہی ہیں، لیکن کھانوں میں مچھلی سے لے کر چھوٹا گوشت تک شامل ہوتا ہے، جس پر روزانہ لاکھوں روپے خرچ آتا ہے۔ یہ اخراجات مخیر حضرات کے تعاون سے پورے کیے جاتے ہیں۔

پشاور میں فکس ایٹ افطار دسترخوان کا آغاز نوجوان سماجی کارکن عدنان خان نے اپنے چند ہم خیال دوستوں کے ساتھ مل کر چند سال پہلے مزدوروں اور کم آمدنی والے افراد میں افطار بکس تقسیم کرنے سے کیا تھا۔

ابتدا میں یہ کام وہ اپنی جیب خرچ سے کرتے تھے، اور اب وہ پشاور میں فکس ایٹ کے نام سے سب سے بڑا افطار دسترخوان لگا رہے ہیں، جہاں روزانہ ہزار سے زیادہ افراد مفت افطاری کرتے ہیں۔

فکس ایٹ پشاور کے رضاکاروں کے مطابق یہ دسترخوان عوام اور ڈونرز کے تعاون سے چلتا ہے، تاہم اسے کامیابی سے چلانے کا سہرا رضاکاروں کو جاتا ہے، جو روزانہ صبح 10 بجے سے کام شروع کرتے ہیں اور افطاری کے بعد رات 12 بجے تک مصروف رہتے ہیں۔

منتظمین کے مطابق اس افطار دسترخوان کے لیے مختلف ڈونرز تعاون کرتے ہیں، جبکہ کچھ ڈونرز چھوٹے جانور اور مچھلی خرید کر لاتے ہیں اور ان کی خواہش کے مطابق اس دن کا مینیو ترتیب دیا جاتا ہے۔

انہوں نے بتایا کہ ان کا مینیو ہر روز مختلف ہوتا ہے۔ ان کے مطابق افطار دسترخوان میں روزہ داروں کی تعداد روز بروز بڑھ رہی ہے اور روزانہ ہزاروں کی تعداد میں لوگ مفت افطار کرتے ہیں۔

مزید تفصیل اس ویڈیو رپورٹ میں، رضاکاروں کی اپنی زبانی۔