وزیراعلیٰ پنجاب مریم نواز شریف نے لاہور میں نئے تعینات چین کے قونصل جنرل سن یان سے ملاقات کی۔ ملاقات میں دونوں رہنماؤں نے پاک چین دوستی، سٹریٹجک شراکت داری اور سی پیک کے تحت اقتصادی اور ثقافتی تعاون کو مزید فروغ دینے پر اتفاق کیا۔
مزید پڑھیں: وزیراعلیٰ پنجاب مریم نواز شریف نے صوبے میں کون سی نئی اصلاحات متعارف کرانے کا فیصلہ کیا؟
وزیراعلیٰ مریم نواز شریف نے نئے قونصل جنرل کو لاہور میں تعیناتی پر مبارکباد دی اور دورہ چین کی دعوت شکریہ کے ساتھ قبول کرلی۔ انہوں نے پاک چین دوستی کو فقیدالمثل قرار دیتے ہوئے کہا کہ پنجاب حکومت چینی سرمایہ کاری، صنعتی ترقی، ٹیکنالوجی کی منتقلی اور روزگار کے مواقع بڑھانے کے لیے پرعزم ہے۔
لاہور میں وزیراعلیٰ مریم نواز شریف اور چین کے نئے قونصل جنرل سن یان کی ملاقات
پاک-چین دوستی اور سٹریٹجک شراکت داری کو مزید فروغ دینے پر اتفاق
وزیراعلیٰ نے چینی سرمایہ کاری، صنعتی ترقی اور ٹیکنالوجی کی منتقلی کو اہم قرار دیا@MaryamNSharif @pmln_org @PMLNDigital pic.twitter.com/fKZzwinMWC— Media Talk (@mediatalk922) March 18, 2026
چینی قونصل جنرل سن یان نے کہا کہ پاک چین تعلقات سٹریٹجک اعتماد، باہمی احترام اور غیر متزلزل یکجہتی کی روشن مثال ہیں۔ انہوں نے پاکستان کی علاقائی سلامتی، ترقی اور بین الاقوامی فورمز پر اصولی حمایت کو قابل تحسین قرار دیا۔
ملاقات میں تجارت، انفراسٹرکچر، توانائی، الیکٹرک موبلٹی، ویسٹ مینجمنٹ اور آئی ٹی کے شعبوں میں دوطرفہ تعاون پر زور دیا گیا۔ پنجاب میں چینی سرمایہ کاروں کے لیے خصوصی اقتصادی زونز قائداعظم بزنس پارک میں گارمنٹس سٹی جیسے منصوبے تیار کیے جا رہے ہیں تاکہ برآمدی مینوفیکچرنگ اور صنعتی شراکت داری کو فروغ دیا جا سکے۔
مزید پڑھیں: وزیراعلیٰ پنجاب مریم نواز شریف سے نیشنل سیکیورٹی ورکشاپ کے شرکا کی ملاقات
وزیراعلیٰ مریم نواز شریف نے چینی شہریوں اور منصوبوں کی حفاظت کو ترجیح قرار دیا اور کہا کہ پنجاب حکومت سرمایہ کاروں کے لیے محفوظ اور دوستانہ کاروباری ماحول فراہم کر رہی ہے۔
