لندن میں پاکستانی ہائی کمشنر ڈاکٹر محمد فیصل نے کہا کہ 29 مارچ سے لندن کے لیے پاکستان انٹرنیشنل ایئرلائنز کی پروازیں بحال کر دی جائیں گی، جبکہ مستقبل میں ان پروازوں کا دائرہ کار دیگر شہروں تک بڑھانے کی بھی کوشش کی جائے گی۔
مزید پڑھیں:پی آئی اے نے فجیرہ کے قریب میزائل حملے اور پرواز سے متعلق خبروں کو بے بنیاد قرار دے دیا
یومِ پاکستان کے موقع پر پاکستان ہاؤس میں منعقدہ تقریب کے بعد میڈیا سے گفتگو کرتے ہوئے انہوں نے کہا کہ پاکستان خطے میں جاری کشیدگی کے خاتمے کے لیے بات چیت کو ہی واحد حل سمجھتا ہے اور اس ضمن میں اپنا کردار ادا کرتا رہا ہے۔
Pakistan’s High Commissioner to London, Dr. Faisal, has officially announced that the first Pakistan International Airlines (PIA) flight will land at London Heathrow Airport on March 29 marking a significant step in restoring direct air links between Pakistan and the United… pic.twitter.com/gNOiwLyW51
— LAFZ DIGITAL (@LafzDigital) March 23, 2026
ان کا کہنا تھا کہ پاکستان کی سیاسی و عسکری قیادت کی مؤثر سفارت کاری کے باعث ملک کے دنیا بھر کے ممالک کے ساتھ دوستانہ تعلقات قائم ہیں اور حکومت کی بھرپور کوشش ہے کہ خطے میں امن قائم ہو۔
ڈاکٹر محمد فیصل نے کہا کہ گزشتہ برس بھارت کی جارحیت کا بھرپور جواب دیا گیا اور آئندہ بھی کسی بھی مہم جوئی کا مؤثر جواب دیا جائے گا، جبکہ افغانستان کے معاملے پر بھی دہشتگردی کے تناظر میں سخت مؤقف اپنایا گیا ہے۔
ایک سوال کے جواب میں انہوں نے کہا کہ حکومتی اخراجات میں کمی لائی جا رہی ہے تاہم کارکردگی پر کوئی سمجھوتا نہیں کیا جائے گا، اور بانیٔ پاکستان قائداعظم محمد علی جناح کے وژن کے مطابق ملک ترقی کی راہ پر گامزن رہے گا۔
مزید پڑھیں:پی آئی اے اب یومیہ 2 پروازیں دبئی اور ابو ظبی کے لیے آپریٹ کرے گی
انہوں نے برطانیہ میں مقیم پاکستانی کمیونٹی کی خدمات کو سراہتے ہوئے کہا کہ مختلف شعبوں میں ان کی کامیابیاں پاکستان کے لیے باعثِ فخر ہیں۔
ہائی کمشنر نے مقبوضہ جموں و کشمیر کے عوام کے ساتھ یکجہتی کا اظہار کرتے ہوئے اقوام متحدہ کی قراردادوں کے مطابق ان کے حقِ خودارادیت کی سفارتی، اخلاقی اور سیاسی حمایت جاری رکھنے کے عزم کا اعادہ بھی کیا۔
