چیئرمین پاکستان علماء کونسل نے کہا ہے کہ موجودہ حالات میں پاکستان کا مثبت کردار خطے اور عالمی سطح پر واضح ہے، اور ملک کو اندرونی انتشار سے بچانا وقت کی اہم ضرورت ہے۔
لاہور میں پریس کانفرنس میں انہوں نے کہا کہ علما امن اور اعتدال کے داعی ہیں اور پاکستان دشمن عناصر کے عزائم کو ناکام بنانا سب کی ذمہ داری ہے۔ پاکستان اور سعودی عرب کا موقف ایک ہے، اور ایران بھی پاکستان کی حمایت کا معترف ہے۔
مزید پڑھیں: افغانستان کے ساتھ جنگ کو جہاد سمجھتے ہیں، پوری قوم افواجِ پاکستان کے ساتھ کھڑی ہے: علامہ طاہر اشرفی
خطے میں کشیدگی بڑھنے سے امن عمل متاثر ہو سکتا ہے، جبکہ امریکا اور اسرائیل کے کردار پر بھی سوالات اٹھنے لگے ہیں۔ علامہ طاہر اشرفی نے کہا کہ ایران اور اسرائیل کشیدگی کے بعد حملوں کا دائرہ وسیع ہونے کا خدشہ ہے، اور تہران کے بعد ریاض اور عمان میں بھی حملوں کی اطلاعات موصول ہوئی ہیں۔
انہوں نے خلیجی ممالک میں لاکھوں پاکستانیوں کی موجودگی کو تشویش کا باعث قرار دیا اور کہا کہ پاکستان کا مؤقف عالمی سطح پر واضح ہے، اور اس کے ثالثی کردار کو سراہا گیا ہے۔
علامہ طاہر اشرفی نے امت مسلمہ میں اتحاد کی ضرورت پر زور دیا اور کہا کہ امت کو تقسیم کر کے مقاصد حاصل کرنے کی کوششیں جاری ہیں۔ انہوں نے بیت المقدس میں مسجد اقصیٰ کی بندش کو تشویشناک قرار دیتے ہوئے کہا کہ 1967 کے بعد پہلی بار عید کی نماز ادا نہیں ہو سکی۔
انہوں نے پاکستان کی نظریاتی بنیادوں اور مذہبی اقدار پر مکمل یقین کا اظہار کیا، معاشرے میں تفرقہ بازی اور فساد کی کسی صورت اجازت نہ دینے، خیر کے کاموں میں تعاون اور مثبت کردار ادا کرنے کے عزم کا اعادہ کیا۔
مزید پڑھیں: افغانوں کو اپنی آدھی روٹی دی لیکن بدلے میں کلاشنکوف اور خودکش کلچر ملا، علامہ طاہر اشرفی
علامہ طاہر اشرفی نے کہا کہ جہاں غلطی ہوگی وہاں اصلاح اور رہنمائی کی جائے گی، اور پاکستان کو مضبوط قومی بیانیے اور اتحاد کے ذریعے خطے اور عالمی سطح پر امن و استحکام کے لیے اپنا کردار ادا کرنا ہوگا۔
