سیاسی جماعت کے فالوورز کی سوشل میڈیا پر اسلام آباد کے سیکٹر جی 11 میں قمر ریاض نامی نوجوان کے قتل کا الزام حکومتی اداروں پر ڈالنے کی ناکام کوشش پکڑی گئی۔ حکام کے مطابق نوجوان کو غیرت کے نام پر قتل کیا گیا لیکن سیاسی جماعت کے سوشل میڈیا ونگز نے 9 مئی کے واقعات کو جواز بنا کر دنیا بھر میں پراپیگنڈا شروع کر دیا تھا۔
اسلام آباد پولیس نے قمر ریاض کے قاتلوں کا سراغ لگا کر سیاسی جماعت کے سوشل میڈیا ونگز کے ذریعے پروپیگنڈا کرنے والوں کی ایک اور کوشش ناکام بنا دی۔ قمر ریاض کو خاتون کے ساتھ ناجائز تعلقات کے شبے میں خاتون کے شوہر نے ساتھیوں الطاف، اللہ ڈوایا اور وسیم کے ساتھ مل کر قتل کیا۔
اسلام آباد پولیس کے مطابق چاروں ملزمان تھانہ رمنا پولیس کی تحویل میں ہیں۔ آئی جی اسلام آباد اکبر ناصر خان نے بھی ملزمان کی گرفتاری کی تصدیق کی ہے۔ کہا گیا ہے کہ اسلام آباد پولیس جھوٹی خبریں پھیلانے والوں کے خلاف قانونی کارروائی کرنے جا رہی ہے۔
ترجمان پولیس کے مطابق سیاسی جماعت کے سوشل میڈیا ونگز کے ذریعے قمر ریاض کے قتل کو 9 مئی کے جلاؤ گھیراؤ کے مرتکب افراد کو بچانے کے لیے استعمال کیا گیا۔ اوورسیز پاکستانیوں میں ریاست مخالف اشتعال انگیزی کی مہم کو دوبارہ سرگرم کرنے کی ہدایات بھی دی گئیں۔ شور مچایا گیا کہ ریاست نے سیاسی کارکن کو حراست میں قتل کر دیا ہے۔
اسلام آباد پولیس نے کہا ہے کہ قاتلوں کی گرفتاری کے بعد قمر ریاض کے قتل کو سیاسی قتل کا رنگ دینے والے سیاسی جماعت کے فالوورز اب کہاں منہ چھپائیں گے ؟
