بنگلہ دیش کرکٹ ٹیم کے نئے چیف سلیکٹر حبیب الحق بشار نے کہا ہے کہ تجربہ کار آل راؤنڈر شکیب الحسن کی ٹیم میں واپسی کا فیصلہ طویل مدتی منصوبہ بندی کو مدنظر رکھ کر کیا جائے گا۔
میڈیا سے گفتگو کرتے ہوئے حبیب الحق بشار نے کہا کہ ان کی توجہ فوری نتائج کے بجائے مستقبل کی مضبوط حکمت عملی پر ہے، اسی لیے شکیب الحسن کی واپسی میں جلد بازی نہیں کی جائے گی۔
یہ بھی پڑھیں: بنگلہ دیشی کرکٹر شکیب الحسن نئی مشکل میں پھنس گئے، بولنگ ایکشن رپورٹ
انہوں نے واضح کیا کہ آئندہ نیوزی لینڈ سیریز کے لیے کھلاڑی کو بغیر مکمل تیاری میدان میں اتارنا مناسب نہیں ہوگا۔
انہوں نے کہا کہ شکیب الحسن ایسے کھلاڑی نہیں جو مناسب میچ پریکٹس کے بغیر مؤثر کارکردگی دکھا سکیں، اس لیے ان کی ٹیم میں شمولیت کا فیصلہ جذبات کے بجائے طویل مدتی منصوبہ بندی کو مدنظر رکھ کر کیا جائے گا۔
یہ بھی پڑھیں: شکیب الحسن کا انٹرنیشنل کرکٹ سے ریٹائرمنٹ کا اعلان
سابق کپتان نے کہا کہ شکیب الحسن میں اب بھی تقریباً 2 سال کی بین الاقوامی کرکٹ باقی ہے اور وہ بدستور قومی ٹیم کے مستقبل کے منصوبوں کا اہم حصہ ہیں۔
ان کے مطابق 2027 کا عالمی کپ ٹیم کی تیاریوں کا مرکزی ہدف ہے اور اسی تناظر میں کھلاڑی کی تیاری پر توجہ دی جارہی ہے۔
