پاکستان کرکٹ ٹیم کے سابق آل راؤنڈر عماد وسیم کی سابقہ اہلیہ ثانیہ اشفاق کے الزامات پر نائلہ راجہ نے آخری وارننگ جاری کر دی۔
نائلہ راجہ نے فوٹو اینڈ ویڈیو شیئرنگ ایپ انسٹاگرام پر ایک اسٹوری میں کہا کہ یہ ناقابلِ یقین ہے کہ کوئی شخص جھوٹی باتیں پھیلائے، پھر وہ اسٹوری ڈیلیٹ کر دے اور اس کے باوجود سوشل میڈیا پیجز بغیر یہ سوچے سمجھے اسے دوبارہ پوسٹ کر دیں کہ اگر یہ سچ تھی تو اسے ہٹایا کیوں گیا؟
انہوں نے ثانیہ کو مخاطب کرتے ہوئے واضح کیا کہ مجھے آپ کے بچوں میں کوئی دلچسپی نہیں ہے۔ یہ آپ اور ان کے والد کے درمیان کا معاملہ ہے اور میں اس پر تبصرہ کرنے والی کوئی نہیں ہوں۔ انہوں نے مزید کہا کہ میں نے کبھی آپ سے بات بھی نہیں کی۔ کیا آپ وضاحت کر سکتی ہیں کہ میں نے کب اور کہاں آپ کے بچوں کے بارے میں پوچھا؟
نائلہ نے کہا کہ یہ میری آخری وارننگ ہے۔ آپ کی جانب سے جھوٹی باتیں پھیلانے اور بلاوجہ مجھے اس میں شامل کرنے کی کوششیں اب بند ہونی چاہئیں۔ براہِ کرم میرے تصاویر اپنی پروفائل پر پوسٹ کر کے فین پیج جیسا رویہ اختیار کرنے سے گریز کریں۔ اپنی زندگی پر توجہ دیں اور میری زندگی سے دور رہیں۔
یہ بھی پڑھیں: نائلہ راجہ میرے ایک بچے کی کسٹڈی اپنے پاس رکھنا چاہتی ہے، عماد وسیم کی سابقہ اہلیہ ثانیہ اشفاق کا الزام
واضح رہے کہ پاکستان کرکٹ ٹیم کے سابق آل راؤنڈر عماد وسیم کی سابقہ اہلیہ ثانیہ اشفاق نے نائلہ راجہ پر الزام لگاتے ہوئے کہا تھا کہ وہ میرے ایک بچے کی کسٹڈی اپنے پاس رکھنا چاہتی ہیں۔
انہوں نے کہا کہ وہ ایسی خاتون کو اپنے بچوں کی زندگی میں شامل نہیں ہونے دیں گی اور اس کا سایہ بھی بچوں پر پڑنے نہیں دیں گی۔
