خیبر پختونخوا کے ضلع بنوں کے وریشمی کلہ منڈان میں موسلا دھار بارش کے باعث ایک گھر کی چھت منہدم ہو گئی، جس کے نتیجے میں 3 بچے جاں بحق اور 2 زخمی ہوگئے۔
دوسری جانب نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف علاقوں میں گرج چمک کے ساتھ مزید بارش اور برفباری کی پیش گوئی کرتے ہوئے الرٹ جاری کردیا۔
موسم خوشگوار لیکن ندی نالوں میں طغیانی
گزشتہ روز لودھراں، جھنگ، موسیٰ خیل، پشاور، باجوڑ اور ملاکنڈ سمیت کئی علاقوں میں بارش نے موسم خوشگوار کر دیا۔
شمالی وزیرستان میں بھی وقفے وقفے سے بارش کا سلسلہ جاری ہے، جس سے ندی نالوں میں پانی کی سطح بلند ہوگئی۔ بابو سر ٹاپ، نانگا پربت اور بٹوگاہ ٹاپ پر گزشتہ شب سے برفباری جاری ہے، جبکہ چلاس شہر اور گردونواح میں بھی بارش کا سلسلہ جاری ہے۔
لاہور میں شدید بارش اور انتظامی اقدامات
لاہور میں بھی مسلسل چھ گھنٹے بارش ریکارڈ کی گئی۔ صوبائی وزیر برائے ہاؤسنگ بلال یاسین نے ایم ڈی واسا کو ہدایت کی ہے کہ شہر کے نشیبی علاقوں سے پانی کی بروقت نکاسی یقینی بنائی جائے، زیر تعمیر سائٹس پر حفاظتی اقدامات کیے جائیں، اور اہم شاہراہوں و انڈر پاسز کی نگرانی کیمروں کے ذریعے جاری رہے۔
صوبائی اور ضلعی ادارے ہوشیار رہیں
این ڈی ایم اے نے مزید کہاکہ گلگت بلتستان، آزاد کشمیر اور خیبر پختونخوا کے بالائی و پہاڑی علاقوں میں شدید برفباری متوقع ہے، لہٰذا تمام صوبائی اور ضلعی ادارے الرٹ رہیں اور ضروری اقدامات بروقت کریں۔
