بنگلہ دیش کے ضلع نارائل میں تیل کی فراہمی کے تنازع پر ایک ٹرک ڈرائیور نے مبینہ طور پر فلنگ اسٹیشن کے منیجر کو ٹرک تلے کچل کر قتل کر دیا، جس کے بعد ملزم کو گرفتار کر لیا گیا۔ حکام کے مطابق واقعہ نے علاقے میں شدید غم و غصہ پیدا کر دیا ہے اور احتجاجاً تمام فلنگ اسٹیشنز نے ایندھن کی فراہمی معطل کر دی۔
یہ بھی پڑھیں:ٹریفک حادثات کی روک تھام ، بنگلہ دیش نے پبلک ٹرانسپورٹ میں جی پی ایس ٹریکنگ لازمی کرنے کا فیصلہ کرلیا
بنگلہ دیشی حکام کے مطابق ریپڈ ایکشن بٹالین (RAB-6) نے ملزم سجات علی کو ضلع جیسور کے علاقے باگھارپارہ سے اتوار کے روز گرفتار کیا۔ حکام کا کہنا ہے کہ ملزم کو انٹیلی جنس بنیادوں پر کارروائی کرتے ہوئے شام تقریباً 4 بجے حراست میں لیا گیا۔
RAB-6 کے کمپنی کمانڈر میجر اے ٹی ایم فضل ربی نے تصدیق کی کہ ملزم نے ابتدائی تفتیش کے دوران جرم کا اعتراف کر لیا ہے۔ مقتول کی شناخت نہید سردار کے نام سے ہوئی ہے جو تنویر فلنگ اسٹیشن، نارائل کے منیجر تھے۔
تحقیقات کے مطابق واقعہ ہفتہ کی شام اس وقت پیش آیا جب ملزم اپنے ٹرک میں ایندھن بھرانے کے لیے اسٹیشن پہنچا، تاہم دیگر گاڑیوں کو پہلے سروس دینے پر وہ مشتعل ہو گیا۔ دونوں کے درمیان تلخ کلامی ہوئی جس کے بعد ملزم کئی گھنٹوں تک باہر انتظار کرتا رہا اور مبینہ طور پر حملے کی منصوبہ بندی کرتا رہا۔
یہ بھی پڑھیں:یونان جانے کی کوشش میں 18 بنگلہ دیشی تارکین وطن ہلاک
پولیس کے مطابق رات تقریباً 2 بجے جب منیجر ڈیوٹی ختم کر کے گھر جا رہے تھے تو ملزم نے ٹرک ان پر چڑھا دیا جس سے وہ موقع پر ہی جاں بحق ہو گئے۔ واقعے کے بعد ملزم جائے وقوعہ سے فرار ہو گیا اور بیناپول میں ٹرک چھپا کر اپنے سسرال میں روپوش ہو گیا، جہاں سے اسے گرفتار کیا گیا۔
حکام کا کہنا ہے کہ ابتدائی تفتیش مکمل ہونے کے بعد ملزم کو مقامی پولیس کے حوالے کر دیا جائے گا۔ دوسری جانب اس واقعے کے خلاف نارائل میں فلنگ اسٹیشنز نے بطور احتجاج ایندھن کی فروخت بند کر دی ہے اور مقتول کے لیے انصاف کا مطالبہ کیا جا رہا ہے۔
