پاکستان تحریک انصاف کی سینیئر رہنما ڈاکٹر یاسمین راشد کو لاہور کی انسداد دہشت گرد عدالت نے جناح ہاؤس حملہ کیس میں بری کر دیا ہے۔
ہفتے کے روز پولیس نے یاسمین راشد کو عدالت میں پیش کیا اور جسمانی ریمانڈ کی استدعا کی جسے عدالت نے مسترد کرتے ہوئے انہیں کیس سے بری کر دیا۔
واضح رہے کہ چیئرمین پاکستان تحریک انصاف (پی ٹی آئی) عمران خان کی القادر ٹرسٹ کرپشن کیس میں گرفتاری کے بعد ملک بھر میں احتجاج کے دوران کارکنان نے اہم املاک پر دھاوا بولا تھا اور اس دوران جناح ہاؤس لاہور میں بھی توڑ پھوڑ کی گئی تھی۔
جناح ہاؤس پر ہونے والے حملوں کے حوالے سے پی ٹی آئی کے ٹکٹ ہولڈر عباد فاروق کی ایک مبینہ آڈیو سامنے آئی تھی جس میں وہ کہہ رہے تھے کہ یاسمین راشد کا حکم ہے کہ کور کمانڈر ہاؤس کو آگ لگا دو۔
اس مبینہ آڈیو کے تناظر میں حکومت کی جانب سے یہ کہا جا رہا ہے کہ یاسمین راشد اس حملے کی ماسٹر مائنڈ ہیں۔