وزیراعلیٰ پنجاب مریم نواز شریف نے صوبے میں صفائی اور نکاسی آب کے نظام کو بہتر بنانے کے لیے ایک اہم اقدام اٹھاتے ہوئے واسا پنجاب سیوریج فلیٹ فیز ون کا افتتاح کر دیا۔
اس موقع پر انہوں نے جدید سیوریج مشینری اور گاڑیوں کا معائنہ کیا اور ان کی کارکردگی کے بارے میں تفصیلات حاصل کیں۔
وزیراعلیٰ نے سیورجینٹک مشین، سیورسکر مشین اور دیگر جدید آلات کا جائزہ لیا اور ڈرائیورز و عملے کو شاباش دیتے ہوئے عوام کی خدمت کے جذبے سے کام کرنے کی تلقین کی۔
یہ بھی پڑھیں: وزیر اعلیٰ مریم نواز کے ماحول دوست اقدامات رنگ لائے، پنجاب میں فضائی معیار میں تاریخی بہتری
انہوں نے واسا پنجاب کو فعال بنانے پر صوبائی وزیر بلال یٰسین، سیکریٹری ہاؤسنگ نورالامین مینگل اور متعلقہ ٹیم کی کارکردگی کو بھی سراہا۔
تقریب کے دوران وزیراعلیٰ نے سیوریج گاڑیوں کی چابیاں صوبائی وزیر ہاؤسنگ کے حوالے کیں جبکہ بلال یاسین نے انہیں واسا پنجاب سیوریج فلیٹ کے بارے میں بریفنگ دی۔
حکام کے مطابق پہلے مرحلے میں 15 اضلاع کو 552 جدید گاڑیاں اور مشینری فراہم کی جا رہی ہے، جن میں سیوریج سکر مشین، سیور جینٹک مشین، ڈی سائیلٹنگ مشین، واٹر باؤزر، ڈی واٹرنگ پمپ، ڈمپر، ٹرک کرین اور دیگر آلات شامل ہیں۔
ابتدائی مرحلے میں جہلم، گجرات، اوکاڑہ، حافظ آباد، سیالکوٹ، شیخوپورہ، ننکانہ، جھنگ اور ساہیوال سمیت دیگر اضلاع کو یہ سہولت فراہم کی جا چکی ہے۔
جبکہ راولپنڈی، فیصل آباد، سرگودھا، ملتان اور ڈیرہ غازی خان میں بھی مشینری پہنچا دی گئی ہے۔ دوسرے مرحلے میں مزید 22 اضلاع کو 937 جدید سیوریج مشینیں اور گاڑیاں فراہم کی جائیں گی۔
وزیراعلیٰ مریم نواز شریف نے کہا کہ پنجاب کی تاریخ میں پہلی بار ضلع کی سطح پر سیوریج سروسز اور آپریشن شروع کیے جا رہے ہیں، جس سے نہ صرف ماحولیات میں بہتری آئے گی بلکہ عوام کو بھی بڑی سہولت میسر ہوگی۔
مزید پڑھیں: پنجاب میں اشیائے خورونوش سستی ترین سطح پر، نیا ریکارڈ قائم
انہوں نے کہا کہ جدید مشینری کی فراہمی کا مقصد سیلابی اور بارش کے پانی سے ہونے والے نقصانات کا ازالہ کرنا ہے۔
انہوں نے اس عزم کا اظہار کیا کہ مون سون سے قبل تمام شہروں میں نکاسی آب کے مؤثر انتظامات مکمل کیے جائیں گے اور ہر ضلع میں بارش کی صورت میں فوری رسپانس یقینی بنایا جائے گا۔
ان کا کہنا تھا کہ عوام کی سہولت اور آسانی حکومت کی اولین ترجیح ہے اور پورے پنجاب میں واسا کے قیام کا وعدہ پورا کر دیا گیا ہے۔
