وزیراعلیٰ پنجاب مریم نواز شریف نے صوبے کے موٹر سائیکل مالکان کے لیے ایک بڑے ریلیف پیکیج کا اعلان کرتے ہوئے متعدد سہولیات اور سبسڈی دینے کا فیصلہ کیا ہے۔
اعلان کے مطابق پنجاب بھر میں موٹر سائیکل کی رجسٹریشن فیس اور دیگر چارجز مکمل طور پر ختم کر دیے گئے ہیں جبکہ موٹر سائیکل کی ٹرانسفر فیس بھی معاف کر دی گئی ہے۔
یہ بھی پڑھیے: وزیراعلیٰ مریم نواز کی زیر صدارت اجلاس، صوبے میں مفت علاج اور صحت کے 4 بڑے منصوبوں کا جائزہ
حکومتی فیصلے کے تحت ہر رجسٹرڈ موٹر سائیکل کو ماہانہ 2000 روپے سبسڈی فراہم کی جائے گی۔ اس کے علاوہ ہر رجسٹرڈ موٹر سائیکل کیلئے 20 لیٹر پٹرول پر بھی سبسڈی دی جائے گی، جس کے تحت فی لیٹر پٹرول 100 روپے کی رعایتی قیمت پر فراہم کیا جائے گا۔
حکومت کی جانب سے بتایا گیا ہے کہ موٹر سائیکل مالکان کے لیے ریلیف پیکیج کا فوری طور پر آغاز کر دیا گیا ہے تاکہ عام شہریوں پر مہنگائی کا بوجھ کم کیا جا سکے۔
فیول سبسڈی حاصل کرنے کیلئے طریقہ کار بھی جاری کر دیا گیا ہے۔ شہری ہیلپ لائن 1000 پر کال کر کے رہنمائی حاصل کر سکتے ہیں، جبکہ اس مقصد کے لیے پلے اسٹور پر دستیاب موبائل ایپ ‘مریم کو بتائیں’ کے ذریعے بھی درخواست دی جا سکتی ہے۔
یہ بھی پڑھیے: پنجاب حکومت کی نئی ٹرانسپورٹ پالیسی: چیف سیکریٹری اور آئی جی پولیس کے لیے 3 سرکاری گاڑیوں کی اجازت
اس کے علاوہ فیول سبسڈی کیلئے آن لائن پورٹل بھی فعال کر دیا گیا ہے۔
وزیراعلیٰ مریم نواز شریف نے کہا کہ حکومت عام آدمی کے معاشی بوجھ میں کمی کیلئے مسلسل اقدامات کر رہی ہے اور عوامی ریلیف ان کی اولین ترجیح ہے۔
