پاکستان کے معروف اداکار اور میزبان فیصل قریشی نے ستارہ امتیاز نہ ملنے پر مایوسی کا اظہار کیا ہے۔
حالیہ پوڈ کاسٹ میں گفتگو کرتے ہوئے فیصل قریشی نے کہا کہ انہیں ستارہ امتیاز کے لیے نامزدگی کے باوجود اب تک یہ اعزاز نہیں ملا۔ انہوں نے مزاحیہ انداز میں کہا کہ میں سوچ رہا ہوں احتجاجاً امتیاز اسٹور جاؤں اور اعلان کروں کہ میں یہاں کھڑا ہوں لیکن مجھے ستارہ ابھی تک نہیں ملا۔ امید ہے کہ اسٹور سے مل جائے گا۔
یہ بھی پڑھیں: کراچی کی ٹوٹی سڑکیں دکھاکر امریکا بتا رہا ہے کہ ایران کو تباہ کردیا، فیصل قریشی کا طنز
فیصل قریشی نے مزید کہا کہ دو بار میرا نام واپس بھیجا ہے۔ ان کا کہنا تھا کہ انہیں یقین نہیں کہ ستارہ امتیاز کس معیار پر دیا جاتا ہے اور انہوں نے خود بھی اس بارے میں کئی بار سوال کیا ہے۔ انہوں نے زور دیا کہ وہ نہ تو کسی سیاسی وابستگی کے حامل ہیں اور نہ ہی ذاتی طور پر کسی پارٹی کے اثر و رسوخ میں ہیں۔
اداکار نے کہا کہ میں حب الوطنی کا جذبہ رکھتا ہوں اور اگر مجھے یہ اعزاز دیا گیا تو میں اسے قبول کروں گا کیونکہ میں اس کا مستحق ہوں۔ اور اگر مجھے ایوارڈ ملا تو یہ کام کی جیت ہے۔
واضح رہے کہ فیصل قریشی ٹی وی اور فلم انڈسٹری کے تجربہ کار اداکار ہیں جن کے یادگار کرداروں میں میری ذات ذرہ بے نشان، میں عبدالقادر ہوں، بشیر مومن، مقدر، خائی، حیوان، فرق، ہُک، بیہروپیا، بھیگی پلکیں، راجہ رانی اور فتور شامل ہیں۔ انہوں نے حال ہی میں ڈرامہ کیس نمبر 9 میں کامران کے کردار میں اپنی شاندار اداکاری کے لیے بھی تعریف حاصل کی۔
