اسلام آباد ہائیکورٹ میں 190 ملین پاؤنڈ کیس میں عمران خان اور بشریٰ بی بی کی سزا معطلی درخواستوں پر سماعت ہوئی۔ سماعت چیف جسٹس سرفراز ڈوگر اور جسٹس محمد آصف نے کی۔
نیب کی جانب سے اسپیشل پراسیکیوٹر جاوید اشرف اور رافع مقصود عدالت میں پیش ہوئے جبکہ عمران خان کے وکیل بیرسٹر سلمان صفدر بھی عدالت میں موجود تھے۔
یہ بھی پڑھیے: عمران خان کو وکیل سے ملاقات کی اجازت دی جائے، اسلام آباد ہائیکورٹ میں درخواست
سماعت کے دوران عدالت نے 31 مارچ کے آرڈر کا حوالہ دیتے ہوئے ریمارکس دیے۔ چیف جسٹس نے کہا کہ عمران خان سے ملاقات کی متفرق درخواست منظور کی جاتی ہے اور جیل حکام کو ہدایت دی کہ بیرسٹر سلمان صفدر کی ملاقات کرائی جائے۔
عدالت نے استفسار کیا کہ ملاقات کس وقت کرنا چاہیں گے جس پر بیرسٹر سلمان صفدر نے دو بجے کا وقت تجویز کیا۔ عدالت نے ہدایت دی کہ کل دو بجے ملاقات کرائی جائے۔
بعد ازاں عدالت نے کیس کی مزید سماعت جمعرات تک ملتوی کر دی۔
سماعت کے دوران اسپیشل پراسیکیوٹر نے استدعا کی کہ کیس پیر کے روز مقرر کیا جائے تاہم چیف جسٹس نے ریمارکس دیے کہ عدالت فریقین کی مصروفیات دیکھ کر تاریخ مقرر کرتی ہے۔
یہ بھی پڑھیے: عمران خان کے بیٹوں نے پاکستان کے خلاف بات کی تو سپورٹ نہیں کریں گے، بیرسٹر گوہر
چیف جسٹس نے کہا کہ ہر ہفتے دو دن اپیل مقرر کی جائے گی اور اپیلوں کو جلد نمٹانے کی کوشش کی جائے گی۔ انہوں نے مزید کہا کہ اگر دلائل شروع ہو جائیں تو 7 دن میں اپیل پر فیصلہ ممکن ہے۔
عدالت نے واضح کیا کہ وہ مقدمات کو جلد نمٹانے کے لیے عملی اقدامات کر رہی ہے اور جیل ملاقات کے بعد مزید عدالتی معاونت کی جائے گی۔
