معروف اداکار ہانیہ عامر نے بتایا کہ انہوں نے سوشل میڈیا سے دوری کیوں اختیار کی۔
ہانیہ عامر نے سوشل میڈیا پر ایک ویڈیو پوسٹ کی جس میں ان کا کہنا تھا کہ انہوں نے سوشل میڈیا پر خواتین کے خلاف بڑھتے ہوئے منفی رویوں کی وجہ سے وقفہ لیا۔
ان کا کہنا تھا کہ میں تنازعات سے ناواقف نہیں ہوں اور جو کچھ میرے اردگرد ہو رہا تھا اس سب کو دیکھ کر میں واقعی بہت تھک گئی تھی۔ میں کچھ وقت اپنے لیے لینا چاہتی تھی کیونکہ اس مقام پر مجھے سمجھ نہیں آ رہا تھا کہ کیا ہو رہا ہے۔
View this post on Instagram
اداکارہ نے کہا کہ میں نے کئی ہفتے یہ سوچتے ہوئے گزارے کہ کیا مجھ میں کوئی خرابی ہے؟ کیا میں کچھ غلط کر رہی ہوں؟ کیا مجھے خود کو بدلنے کی ضرورت ہے؟ کیا مجھے چیزیں مختلف طریقے سے کرنی چاہئیں؟ پھر مجھے احساس ہوا کہ لوگ بس خوش خواتین سے نفرت کرتے ہیں۔ ان میں سے زیادہ تر ہمارے اپنے ہی شعبے سے ہوتے ہیں۔ لوگ ہمیں نیچا دکھاتے ہیں
ہانیہ عامر نے کہا کہ میں صرف مردوں کی بات نہیں کر رہی خواتین بھی ایک دوسرے کو نیچا دکھاتی ہیں۔ یقیناً لوگ ہم سے نفرت کرتے ہیں کیونکہ وہ چاہتے ہیں کہ ہم ان کے بنائے ہوئے سانچے میں فٹ ہوں۔
یہ بھی پڑھیں: دوست کی شادی میں ہانیہ عامر کا ڈانس، ویڈیوز سوشل میڈیا پر وائرل
انہوں نے مزید کہا کہ اصل مسئلہ تب پیدا ہوتا ہے جب ہم یہ سوچتے ہیں کہ لوگ کیا کہیں گے جو ایک بہت پرانا تصور ہے۔ ہم بہت بات کرتے ہیں کہ لوگوں کی باتوں کی پرواہ نہ کریں لیکن اب یہ سب رشتہ داروں اور خاندان سے نکل کر انسٹاگرام تک منتقل ہو گیا ہے۔
ہم اب بھی خواتین کو ایک دوسرے کے خلاف کھڑا کر رہے ہیں اب بھی انہیں رنگ، جسمانی ساخت اور دیگر چیزوں کی بنیاد پر لیبل کر رہے ہیں جیسے گوری، سانولی، موٹی یا دبلی۔ یہ نفرت خواتین کے لیے اچھی نہیں ہے اور میں خواتین سے بھی اپیل کرتی ہوں کہ یہ سب بے معنی ہو چکا ہے کیونکہ آپ بلاوجہ دوسروں پر انگلیاں اٹھا رہی ہیں۔
ان کا کہنا تھا کہ میں نے حال ہی میں دیکھا ہے کہ خواتین کو صرف اپنے وجود کی وجہ سے بھی تنگ کیا جا رہا ہے وہ کچھ کہہ بھی نہیں رہیں۔ براہِ کرم انہیں تنگ کرنا بند کریں۔ انہیں وہی بننے دیں جو وہ ہیں ہر کوئی ایک جیسا نہیں ہو سکتا۔
