وفاقی وزیر اطلاعات و نشریات عطااللہ تارڑ نے کہا ہے کہ کوریج کے لیے آنے والے غیرملکی صحافیوں کو خوش آمدید کہتے ہیں۔ نائب وزیراعظم اسحاق ڈار نے اعلان کیا ہے کہ ایران اور امریکا کے صحافیوں کے لیے ویزا آن ارائیول ہوگا۔
غیر ملکی صحافیوں کو فراہم کی گئی سہولیات کے حوالے سے خصوصی گفتگو کرتے ہوئے انہوں نے کہاکہ کوریج کے لیے دنیا بھر سے صحافی پاکستان پہنچ رہے ہیں۔
انہوں نے کہاکہ صحافیوں کو ایک ہی چھت تلے تمام ضروری سہولیات فراہم کی جا رہی ہیں، 50 کے قریب صحافی پاکستان پہنچ چکے ہیں۔
عطااللہ تارڑ نے کہاکہ چین، سعودی عرب، جاپان، جرمنی، کوریا سمیت مختلف ممالک سے صحافیوں نے ویزا کی درخواستیں دی ہیں۔
انہوں نے کہاکہ وزارت اطلاعات و نشریات نے جناح کنونشن سینٹر میں صحافیوں کے لیے ایک چھت تلے تمام ضروری سہولیات میسر کی ہیں۔
عطااللہ تارڑ نے کہاکہ ہائی اسپیڈ انٹرنیٹ کنیکٹیویٹی، پرنٹرز، کمپیوٹرز اور اسکرینز نصب کی گئی ہیں، صحافتی امور انجام دینے کے لیے درکار تمام سہولیات یہاں میسر کی گئی ہیں۔
انہوں نے کہاکہ جناح کنونشن سینٹر سے ریڈ زون قریب ہے، صحافی یہاں سے باآسانی کوریج کر سکتے ہیں، صحافیوں کو کارڈز جاری کیے گئے ہیں۔
وزیر اطلاعات نے کہاکہ تمام سہولیات ایک ہی جگہ فراہم کرنے کی کوشش کی گئی ہے تاکہ صحافیوں کو کوریج میں کوئی دقت نہ پیش آئے۔
