پاکستان کرکٹ بورڈ نے زمبابوے کے فاسٹ بولر بلیسنگ موزاربانی پر معاہدے کی خلاف ورزی کے باعث سخت کارروائی کرتے ہوئے انہیں پاکستان سپر لیگ کے آئندہ 2 ایڈیشنز سے باہر کر دیا ہے۔
بورڈ کی جانب سے جاری بیان کے مطابق، مکمل تادیبی کارروائی کے بعد موزاربانی کو فوری طور پر پی ایس ایل کے آئندہ 2 ایڈیشنز میں شرکت کے لیے نااہل قرار دے دیا گیا ہے۔
پی سی بی کا کہنا ہے کہ کھلاڑی نے اپنے طے شدہ معاہدے کی خلاف ورزی کی اور پیشہ ورانہ ذمہ داریوں کو نظر انداز کیا۔ بیان میں مزید کہا گیا کہ واضح شرائط پر رضامندی کے باوجود انہوں نے دیگر مصروفیات کو ترجیح دی، جو لیگ کے نظم و ضبط اور پیشہ ورانہ معیار کے لیے نقصان دہ ہے۔
یہ بھی پڑھیے پی سی بی کا زمبابوین کرکٹر بلیسنگ موزاربانی کے خلاف قانونی ایکشن کا فیصلہ
بورڈ نے اس اقدام کو لیگ کے معیار اور ڈسپلن کو برقرار رکھنے کے لیے ضروری قرار دیتے ہوئے واضح کیا کہ تمام کھلاڑیوں سے معاہدوں کی مکمل پاسداری یقینی بنائی جائے گی۔
یاد رہے کہ بلیسنگ موزاربانی نے پی ایس ایل سے معاہدہ کرنے کے بعد انڈین پریمیئر لیگ میں شرکت کو ترجیح دی تھی، جس کے باعث یہ کارروائی عمل میں لائی گئی۔
