پاکستان میں تعینات ترکیہ کے سفیر عرفان نذیر اوغلو نے مشیرِ وزیراعظم برائے بین الصوبائی رابطہ و عوامی امور رانا ثناء اللہ سے ملاقات کی، جس میں باہمی دلچسپی کے امور اور خطے کی بدلتی ہوئی صورتحال پر تفصیلی گفتگو کی گئی۔ اس موقع پر وفاقی سیکریٹری بین الصوبائی رابطہ محی الدین احمد وانی بھی موجود تھے۔
مزید پڑھیں: یوگنڈا کے آرمی چیف کا ترکیہ سے انوکھا مطالبہ، ایک ارب ڈالر اور ‘خوبصورت ترین دلہن’ مانگ لی
ملاقات کے دوران دونوں رہنماؤں نے امریکا، اسرائیل اور ایران کے درمیان بڑھتی ہوئی کشیدگی پر تشویش کا اظہار کیا اور اس بات پر اتفاق کیا کہ جنگ کسی مسئلے کا حل نہیں بلکہ اس سے انسانی جانوں کے ضیاع کے ساتھ عالمی معیشت اور توانائی کے شعبے کو بھی نقصان پہنچ رہا ہے۔ انہوں نے تنازعات کے سفارتی حل اور خطے میں امن کے قیام کی ضرورت پر زور دیا۔
ترک سفیر عرفان نذیر اوغلو کی مشیرِ وزیراعظم رانا ثناء اللہ سے ملاقات؛ علاقائی صورتحال اور دوطرفہ تعاون پر تبادلہ خیال۔ دونوں رہنماؤں نے باہمی دلچسپی کے امور سمیت خطے کی بدلتی ہوئی سیاسی و دفاعی صورتحال پر تفصیلی گفتگو کی۔@sajidsheikh321 @iamabidmalik @trtworld #turkia pic.twitter.com/jCoESxQS8r
— Media Talk (@mediatalk922) April 14, 2026
رانا ثناء اللہ نے ترک سفیر کو پاک افغان سرحد کی صورتحال اور افغانستان کے ساتھ تعلقات کے حوالے سے پاکستان کے مؤقف سے آگاہ کیا۔
ترک سفیر نے بتایا کہ ترکیہ کے وزیرِ کھیل مئی میں پاکستان کا دورہ کریں گے، جس کا مقصد دونوں ممالک کے درمیان کھیلوں کے شعبے میں تعاون کو فروغ دینا اور نوجوانوں کے لیے مشترکہ مواقع پیدا کرنا ہے۔
مزید پڑھیں: ترکیہ کا ایران امریکا جنگ بندی کا خیرمقدم، ثالثی کے عمل میں پاکستان کے کردار کی تعریف
اس موقع پر محی الدین وانی نے بین الصوبائی سطح پر ترکیہ کے ساتھ مختلف شعبوں میں تعاون بڑھانے کے عزم کا اعادہ کیا۔
رانا ثنا اللہ نے پاکستان اور ترکیہ کے دیرینہ برادرانہ تعلقات کو سراہتے ہوئے کہا کہ دونوں ممالک ہر مشکل وقت میں ایک دوسرے کے ساتھ کھڑے رہے ہیں اور مستقبل میں بھی یہ تعلقات مزید مضبوط ہوں گے۔
