وزیراعلیٰ پنجاب مریم نوار نے گندم کے کاشتکاروں کیلئے بڑے ریلیف پیکیج کا اعلان کرتے ہوئے 6 ارب روپے مالیت کا باردانہ مفت فراہم کرنے کی منظوری دے دی۔
وزیراعلیٰ نے حکام کو ہدایت کی ہے کہ کاشتکاروں سے 3500 روپے فی من کے حساب سے گندم کی خریداری فوری طور پر شروع کی جائے۔ ان کی ہدایت پر رجسٹرڈ کاشتکاروں کو پرچیز سینٹرز سے فی ایکڑ 10 بوری باردانہ فراہم کیا جائے گا۔
یہ بھی پڑھیں: مریم نواز کی گرین ٹریکٹر اسکیم کے تحت 39 کسانوں میں ٹریکٹر تقسیم
حکومت نے کسان کارڈ ہولڈرز سے ترجیحی بنیادوں پر گندم خریدنے کا اصولی فیصلہ بھی کیا ہے، جبکہ یہ بھی لازم قرار دیا گیا ہے کہ گندم کی خریداری کے 72 گھنٹے کے اندر کاشتکاروں کو ادائیگی یقینی بنائی جائے۔
دوسری جانب وزیراعلیٰ نے ’’ورک ود پنجاب گورنمنٹ‘‘ پروگرام کے آغاز کا اعلان بھی کیا ہے، جس کے تحت ایگری کلچر گریجوایٹس سمیت دیگر نوجوانوں کو انٹرن شپ کے مواقع فراہم کیے جائیں گے۔
یہ بھی پڑھیں: گندم کی فی من قیمت 3500 روپے مقرر، حکومت نے قومی گندم پالیسی کی منظوری دے دی
مریم نواز کا کہنا تھا کہ کسانوں کو کسی صورت متاثر نہیں ہونے دیا جائے گا اور زرعی شعبے کو پائیدار بنیادوں پر استوار کیا جا رہا ہے۔ انہوں نے دعویٰ کیا کہ گزشتہ 2 سال میں زرعی ترقی کے حوالے سے نمایاں کامیابیاں حاصل ہوئی ہیں اور حقیقی زرعی انقلاب کی بنیاد رکھ دی گئی ہے۔
