پی ایس ایل کی 3 بار کی چیمپئن اور دنیا کی معروف ترین کرکٹ فرنچائز لاہور قلندرز نے ایکسون موبل گلوبل سپر لیگ (جی ایس ایل) میں شرکت کی تصدیق کرکے ایک بارپھر انٹرنیشنل لیول پر اپنی واپسی کا اعلان کردیا۔
جی ایس ایل 23 جولائی سے یکم اگست 2026 تک گیانا نیشنل اسٹیڈیم میں منعقد ہوگی، جس میں دنیا بھر کی صفِ اول کی فرنچائزز حصہ لیں گی۔ اس سے قبل لاہور قلندرز ٹورنامنٹ کے افتتاحی ایڈیشن کا بھی حصہ رہ چکی ہے، ٹورنامنٹ میں ان کی دوبارہ شمولیت انٹرنیشنل کرکٹ میں فرنچائز کے بڑھتے ہوئے مقام اور مختلف لیگز کے درمیان مقابلوں کی بڑھتی ہوئی اہمیت کو اجاگر کرتی ہے۔
یہ بھی پڑھیں: لاہور قلندرز جیتے یا ہارے، مجھے اس سے فرق نہیں پڑتا، عاطف رانا
فرنچائز کرکٹ کی دنیا میں لاہور قلندرز کا شمار سب سے زیادہ فالو کی جانے والی اور کمرشلی طور پر کامیاب ٹیموں میں ہوتا ہے، جنہوں نے شائقین کے ساتھ گہرے تعلق کی بنیاد پر ایک مضبوط برانڈ بنایا ہے۔
View this post on Instagram
لاہور قلندرز کے ٹیم اونر، ثمین رانا نے اس حوالے سے کہاہے کہ ہم ایکسون موبل گلوبل سپر لیگ میں واپسی پر بے حد خوش ہیں، افتتاحی ایڈیشن اعلی معیار کی کرکٹ اور عالمی روابط کے لیے ایک شاندار پلیٹ فارم تھا، اور ہمیں ایک بار پھر اس ٹورنامنٹ میں پاکستان کی نمائندگی کرنے پر فخر ہے۔
یہ ٹورنامنٹ ہمیں اپنی صلاحیت، ثقافت اور مقصد کو دنیا کے سامنے پیش کرنے کا موقع فراہم کرتا ہے۔ مجھے رواں سال اپنے پلیئر ڈیولپمنٹ پروگرام کے باصلاحیت کھلاڑیوں کو جی ایس ایل میں متعارف کرانے کا شدت سے انتظار ہے۔
یہ بھی پڑھیں: کرکٹ پلیئرز ہاکی گراؤنڈ میں، لاہور قلندرز ہاکی لیگ کے لیے کراچی میں ٹرائلز
گلوبل سپر لیگ کے چیئرمین کلائیو لائیڈ نے کہا کہ لاہور قلندرز کو گلوبل سپر لیگ میں دوبارہ خوش آمدید کہتے ہوئے خوشی محسوس کر رہے ہیں۔لاہور قلندرز انٹرنیشنل ٹی ٹوئنٹی کرکٹ کی سب سے کامیاب فرنچائزز میں سے ایک ہے، جن کے پاس پرجوش فینز کی بڑی تعداد موجود ہے۔
ان کی شمولیت ٹورنامنٹ کے معیار اور وقار میں نمایاں اضافہ کرے گی ۔ جی ایس ایل کے لئے لاہور قلندرز کے سکواڈ کا اعلان مناسب وقت پر کیا جائے گا۔
