ایران کے صدر مسعود پزشکیان نے کہا ہے کہ ان کا ملک جنگ کا خواہاں نہیں بلکہ مسائل کے حل کے لیے مذاکرات کو ترجیح دیتا ہے، تاہم امریکا کی جانب سے دباؤ ڈالنے یا ایران کو جھکانے کی کوئی بھی کوشش کامیاب نہیں ہوگی۔
ایرانی خبر رساں ادارے ’ارنا‘ کے مطابق صدر پزشکیان نے اپنے بیان میں کہا کہ امریکا اگر اپنی مرضی مسلط کرنے یا ایران کو ہتھیار ڈالنے پر مجبور کرنے کی کوشش کرے گا تو اسے ناکامی کا سامنا کرنا پڑے گا۔
انہوں نے عالمی قوانین اور انسانی اصولوں کا حوالہ دیتے ہوئے سوال اٹھایا کہ شہریوں، دانشوروں اور بچوں کو نشانہ بنانے اور اسکولوں و اسپتالوں سمیت اہم تنصیبات کو تباہ کرنے کا آخر کیا جواز ہو سکتا ہے۔
صدر پزشکیان نے زور دیا کہ ایران بات چیت کے ذریعے مسائل کا حل چاہتا ہے، لیکن اپنی خودمختاری اور اصولوں پر کسی قسم کا سمجھوتہ نہیں کرے گا۔
