ملک بھر میں حج پروازوں کا باقاعدہ آغاز ہو گیا، کراچی سے پہلی پرواز 160 عازمین کو لے کر حجاز مقدس روانہ ہوئی جہاں اس سال ہزاروں پاکستانی فریضہ حج ادا کریں گے۔
ملک بھر کے ہوائی اڈوں سے حج آپریشن کا آغاز ہو گیا ہے اور کراچی سے پہلی حج پرواز نجی ایئر لائن کے ذریعے 160 عازمین کو لے کر روانہ ہو گئی۔ روانگی کے موقع پر گورنر سندھ نہال ہاشمی اور وزارت مذہبی امور کے اعلیٰ حکام نے عازمین کو رخصت کیا اور انہیں مبارکباد دی۔
حکام کے مطابق رواں سال کراچی ایئرپورٹ سے 31 ہزار سے زائد عازمین حج کے لیے سعودی عرب روانہ ہوں گے۔ اس موقع پر عازمین کے لیے خصوصی انتظامات کیے گئے ہیں تاکہ انہیں سہولت فراہم کی جا سکے۔
یہ بھی پڑھیں:خدام الحجاج کی ایڈوانس ٹیم مدینہ منورہ پہنچ گئی، ڈائریکٹر حج مدینہ کے ساتھ مشاورتی اجلاس
روڈ ٹو مکہ پراجیکٹ کے تحت سعودی حکام کراچی ایئرپورٹ پر ہی عازمین کی ون ٹائم امیگریشن مکمل کریں گے، جس سے سعودی عرب پہنچنے پر انہیں مزید کارروائی سے گزرنا نہیں پڑے گا اور ان کے سفر کو آسان بنایا جا سکے گا۔
