وزیر اعلیٰ پنجاب مریم نواز نے عالمی یومِ کتب کے موقع پر اپنے پیغام میں کتابوں کی اہمیت پر زور دیتے ہوئے کہا ہے کہ ڈیجیٹل دور کے باوجود کتاب کی اہمیت کم نہیں ہوئی بلکہ یہ آج بھی انسان کی فکری تربیت اور شعور کی بنیاد ہے۔
یہ بھی پڑھیں:مریم نواز کا ’اپنا کھیت، اپنا روزگار‘ اسکیم کا آغاز، بے زمین کسانوں کو زرعی اراضی دینے کا منصوبہ
وزیر اعلیٰ پنجاب مریم نواز نے عالمی یومِ کتب پر اپنے پیغام میں کتاب لکھنے، چھاپنے، فروخت کرنے اور پڑھنے والوں کو خراجِ تحسین پیش کیا۔ انہوں نے کہا کہ کتاب انسان کی فکری تربیت، شعور اور ایک مہذب معاشرے کی تشکیل میں بنیادی کردار ادا کرتی ہے۔
انہوں نے کہا کہ کتب بینی کی عادت انسان کے شعور کو جلا بخشتی ہے اور نوجوان نسل کو مثبت اور تعمیری سوچ کی طرف راغب کرنے کی ضرورت ہے۔ مریم نواز کے مطابق حکومت پنجاب پہلی بار ’موبائل لائبریری‘ کا منصوبہ متعارف کرا رہی ہے تاکہ کتاب ہر فرد تک پہنچ سکے۔
وزیر اعلیٰ نے کہا کہ کتاب ہمیں مختلف خیالات، تہذیبوں اور تجربات سے روشناس کراتی ہے اور اس کے مطالعے سے برداشت، مکالمہ اور معاشرتی ہم آہنگی کو فروغ ملتا ہے۔
انہوں نے اپنے ذاتی شوق کا ذکر کرتے ہوئے کہا کہ انہیں کتاب پڑھنا بہت پسند ہے اور جب بھی فرصت ملتی ہے وہ کتاب کا مطالعہ ضرور کرتی ہیں۔
