اسلام آباد کے تھانہ ترنول میں پولیس نے سوشل میڈیا پر مبینہ طور پر اشتعال انگیز پوسٹ شیئر کرنے اور مجاز اتھارٹی کے حکم کی خلاف ورزی پر مقدمہ درج کر لیا ہے۔ مقدمہ زیر دفعہ 188، 341 اور 511 تعزیراتِ پاکستان کے تحت درج کیا گیا۔
پولیس رپورٹ کے مطابق 21 اپریل 2026 کو اسسٹنٹ سب انسپکٹر عرفان اللہ خان اپنی ٹیم کے ہمراہ معمول کی چیکنگ پر ترنول کے علاقے میں موجود تھے کہ اس دوران سوشل میڈیا پر ایک پوسٹ زیر گردش دیکھی گئی، جس میں مبینہ طور پر ترنول پھاٹک کو بند کرنے سے متعلق رائے اور تبصرہ شامل تھا۔
پولیس کے مطابق جب موقع پر جا کر معلومات حاصل کی گئیں تو معلوم ہوا کہ یہ پوسٹ مبینہ طور پر خرم نذیر ولد راجہ محمد نذیر ساکن پراچہ ٹاؤن، ڈھوک پراچہ اسلام آباد نے شیئر کی تھی۔
ابتدائی رپورٹ کے مطابق سیکیورٹی حالات کے پیش نظر اسلام آباد انتظامیہ کی جانب سے دفعہ 144 نافذ ہے، اور اس نوعیت کی سرگرمیوں اور تشہیر پر پابندی عائد ہے۔ پولیس کا کہنا ہے کہ مذکورہ شخص نے مبینہ طور پر اس حکم کی خلاف ورزی کرتے ہوئے عوام کو ترنول پھاٹک بند کرنے پر اکسانے کی کوشش کی۔
یہ بھی پڑھیں:لاہور: ’ گٹر میں گرنے والی ماں، بیٹی کی خبر کو فیک نیوز کہنے والوں پر پیکا لگے گا؟‘
پولیس نے ملزم کو موقع سے حراست میں لے لیا، جبکہ اس کے موبائل فون کی جانچ کے دوران مبینہ طور پر پوسٹ کی تصدیق بھی ہوئی۔ پولیس نے مقدمہ درج کر کے مزید تفتیش شروع کر دی ہے اور کیس کو متعلقہ تفتیشی افسر کے سپرد کر دیا گیا ہے۔
