’اتنا اعتماد کہاں سے آتا ہے؟‘، لاہور قلندرز کے پلے آف سے باہر ہونے پر شاہین آفریدی کا بیان مذاق بن گیا

پاکستان سپر لیگ (پی ایس ایل) سیزن 11 کے پلے آف مرحلے کے لیے ٹیموں کا فیصلہ ہو گیا ہے جس میں ایک بڑی اپ سیٹ دیکھنے میں آئی ہے۔ تین مرتبہ کی چیمپئن لاہور قلندرز ایونٹ سے باہر ہو گئی ہے جبکہ پہلی بار ٹورنامنٹ میں شرکت کرنے والی حیدرآباد کنگز نے شاندار کارکردگی کا مظاہرہ کرتے ہوئے پلے آف مرحلے میں جگہ بنا لی ہے۔

سوشل میڈیا پر اس پیش رفت کے بعد مختلف ردعمل سامنے آ رہے ہیں۔ متعدد صارفین نے لاہور قلندرز کے کپتان شاہین شاہ آفریدی کا ایک بیان شیئر کیا جس میں وہ پلے آف سے قبل پُرامید نظر آتے ہوئے کہتے ہیں کہ ٹیم کے پاس مزید دو سے تین دن ہیں اور وہ پلے آف میں اور اچھا کھیلیں گے۔ تاہم ٹیم اس موقع سے فائدہ اٹھانے میں ناکام رہی اور ٹورنامنٹ سے باہر ہو گئی۔ صارف نے شاہین کی ویڈیو شیئر کرتے ہوئے لکھا کہ ’اتنا اعتماد کہاں سے آتا ہے؟‘۔

🚨Last Day Shaheen Said 🗣️:- We will do better in Playoffs

• And Today his team knocked out 😭😭

Itna Overconfidence Kaha se Ajata pic.twitter.com/dHitT9hdEE

— SheR•ALI (@Sher__Ali) April 26, 2026

ایک سوشل میڈیا صارف نے شاہین آفریدی کی ویڈیو پر تبصرہ کرتے ہوئے کہا کہ اگر حد سے زیادہ خوداعتمادی دیکھنی ہو تو یہ دیکھ لیں۔

Hahahahah
Overconfidence dekhna hai tou ye dekhoo https://t.co/7jimO5ceIM

— Salman Malik Awan (@Armughan09) April 26, 2026

سپورٹس جرنلسٹ سہیل عمران نے لکھا کہ یقین نہیں آ رہا کہ لاہور قلندرز باہر ہو گئی ہے۔

Can't believe it .
LQ is Out of Play offs
Anyhow congratulations HK#PSL

— Sohail Imran (@sohailimrangeo) April 26, 2026

اظہر نسیم خان نے لاہور قلندرز کے باہر ہونے پر افسوس کا اظہار کرتے ہوئے طنزاً لکھا کہ لاہور قلندرز اس بار ایسے باہر ہوئی ہے جیسے مہمان کھانا کھائے بغیر ہی اٹھ کے چلا جائے۔

لاہور قلندرز فینز کے ساتھ دلی افسوس 😅
قلندرز اس بار ایسے باہر ہوئی ہے جیسے مہمان کھانا کھائے بغیر ہی اٹھ کے چلا جائے 😂

— Azhar Naseem Khan🇵🇰 (@p_naseemkhan) April 26, 2026

واضح رہے کہ پشاور زلمی نے 17 پوائنٹس کے ساتھ پہلی، اسلام آباد یونائیٹڈ نے 13 پوائنٹس حاصل کرکے دوسری، ملتان سلطانز نے 12 پوائنٹس کے ساتھ تیسری پوزیشن حاصل کی جبکہ حیدرآباد کنگزمین کی ٹیم چوتھی پوزیشن پر رہی۔

ایونٹ میں پلے آف کا سلسلہ منگل 28 اپریل سے شرو ع ہوگا، 29 اپریل کو پہلے ایلی مینیٹر میں حیدرآباد کنگز مین اور ملتان سلطانز کی ٹیمیں لاہور میں مدمقابل ہوں گی جبکہ دوسرا ایلی مینیٹر یکم مئی کو لاہور میں ہی کھیلا جائے گا۔ ٹورنامنٹ کا فائنل 3 مئی کو ہوگا۔

یاد رہے کہ لاہور قلندرز کی ٹیم نے سنہ 2022 میں پہلی بار پی ایس ایل کا ٹائٹل اپنے نام کیا۔ سنہ 2023 میں بھی چیمپئن بننے کا اعزاز حاصل کیا جبکہ سنہ 2025 میں تیسری مرتبہ ٹرافی جیت کر خود کو لیگ کی مضبوط ترین ٹیموں میں شامل کر لیا۔ ان شاندار کامیابیوں کے باعث پی ایس ایل سیزن 11 میں بھی لاہور قلندرز کو فیورٹ ٹیموں میں شمار کیا جا رہا تھا، تاہم ٹیم توقعات پر پورا اترنے میں ناکام رہی۔