بھارت کی خفیہ ایجنسی ریسرچ اینڈ اینالیسز ونگ (را) سے منسوب مبینہ خفیہ دستاویزات سامنے آئی ہیں جن میں مقبوضہ جموں و کشمیر کے علاقے پہلگام میں فالس فلیگ آپریشن میں بھارتی ایجنسی کا کردار بےنقاب ہوگیا ہے۔
کشمیر میڈیا سروس کی رپورٹ میں کہا گیا ہے کہ ان مبینہ دستاویزات کے مطابق یہ کارروائی ایک منظم منصوبے کے تحت ترتیب دی گئی تھی جس کا مقصد سیاسی اہداف حاصل کرنا اور اندرونی شدت پسندی سے توجہ ہٹانا بتایا گیا ہے۔
یہ بھی پڑھیے: پہلگام واقعے میں پاکستان کا واضح سچ سامنے آیا، بھارتی الزامات کو پذیرائی نہ مل سکی، عطا تارڑ
دعووں کے مطابق منصوبے میں ایک جعلی حملہ کروا کر اس میں غیر مسلموں کے متاثر ہونے کا تاثر دینے کی حکمت عملی شامل تھی۔ دستاویزات میں یہ بھی کہا گیا ہے کہ ایک مربوط میڈیا اور سوشل میڈیا مہم چلانے کی ہدایات دی گئیں جن کے تحت 200 سے زائد اکاؤنٹس کو متحرک کرنے کا منصوبہ تھا۔
مزید دعووں میں کہا گیا ہے کہ واقعے کے چند گھنٹوں کے اندر پاکستان مخالف بیانیہ پھیلانے اور بعد ازاں بین الاقوامی سطح پر انسداد دہشت گردی کے تعاون کے لیے ماحول بنانے کی حکمت عملی تیار کی گئی تھی۔
