عازمین حج کی سہولت، رہائش اور انتظامی امور پر سردار محمد یوسف کی زیر صدارت حج انتظامات کے جائزہ اجلاس میں پیشرفت کا تفصیلی جائزہ لیا گیا جس میں بتایا گیا کہ سرکاری اسکیم کے تحت عازمین کی بڑی تعداد مدینہ منورہ پہنچ چکی ہے جبکہ ان کی سہولت کے لیے تمام ضروری انتظامات مکمل کیے جا رہے ہیں۔
یہ بھی پڑھیں: دنیا بھر سمیت پاکستان سے بھی عازمین حج کا سعودی عرب پہنچنے کا سلسلہ جاری، گرمی سے بچاؤ کے لیے خاص ہدایات
اجلاس میں عازمین حج کی سہولت، رہائش، نقل و حمل اور طبی سہولیات سمیت مختلف امور کا تفصیلی جائزہ لیا گیا۔
اجلاس میں سیکریٹری مذہبی امور ابرار احمد مرزا، ایڈیشنل سیکریٹری ڈاکٹر ساجد محمود چوہان اور جوائنٹ سیکریٹری حج محمد بخش سانگی نے بریفنگ دی۔
مکہ مکرمہ سے زوم کے ذریعے چیف کوآرڈینیٹر مکہ ڈاکٹر مرزا علی محسود، کوآرڈینیٹر مکہ ذوالفقار خان اور حج ڈائریکٹرز مکہ و مدینہ منورہ نے بھی اجلاس میں شرکت کی اور زمینی صورتحال سے آگاہ کیا۔
مزید پڑھیے: پاکستان علما کونسل اور دارالافتا پاکستان کی جانب سے حجاج و عمرہ زائرین کے لیے ضابطہ اخلاق جاری
حج ڈائریکٹر مدینہ کی بریفنگ کے مطابق منگل 28 اپریل تک 20 ہزار سے زائد سرکاری عازمین مدینہ منورہ پہنچ چکے ہیں جبکہ تمام عازمین کو نسک کارڈ کی فراہمی بھی یقینی بنائی گئی ہے۔
انہوں نے بتایا کہ اب تک تقریباً 11 ہزار سرکاری عازمین کو ریاض الجنہ کی زیارت بھی کروائی جا چکی ہے۔
ڈائریکٹر حج مکہ نے مزید بتایا کہ حرم ٹرانسپورٹ کے لیے 5 بس اڈے مختص کیے گئے ہیں تاکہ عازمین کو آمد و رفت میں کسی قسم کی مشکلات کا سامنا نہ کرنا پڑے۔
پاکستان حج میڈیکل مشن کے سربراہ کرنل ڈاکٹر توقیر نے اجلاس میں بتایا کہ مدینہ منورہ میں ایک اسپتال اور 3 ڈسپنسریاں فعال ہیں جبکہ مکہ مکرمہ میں عازمین کی تعداد کے مطابق 5 ڈسپنسریاں قائم کی گئی ہیں۔
مزید پڑھیں: جرمانے، ملک بدری اور 10 سال پابندی، حج قوانین کی خلاف ورزی پر سخت کارروائی کا اعلان
انہوں نے بتایا کہ پاکستان سے ادویات کی ترسیل مکمل کر لی گئی ہے تاکہ عازمین کو بروقت طبی سہولیات فراہم کی جا سکیں۔
وفاقی وزیر سردار محمد یوسف نے ہدایت کی کہ عازمین حج کی آسائش کا مکمل خیال رکھا جائے اور کسی بھی شکایت کی صورت میں فوری ازالہ یقینی بنایا جائے۔ 
انہوں نے کہا کہ خدام الحجاج عازمین کی رہنمائی کے لیے ہر وقت مستعد رہیں۔
یہ بھی پڑھیے: عازمینِ حج کے لیے بڑا ریلیف، تمام مراحل ایک ہی دن میں مکمل کرنے کا فیصلہ
سردار محمد یوسف نے مزید کہا کہ عازمین حج سعودی عرب میں قیام کے دوران تمام قوانین کی مکمل پابندی کریں اور ملکی وقار کو ہر صورت مقدم رکھیں۔
