ایپل اپنے آئندہ آپریٹنگ سسٹم iOS 27 کے لیے مصنوعی ذہانت (AI) پر مبنی جدید فوٹو ایڈیٹنگ ٹولز کا ایک نیا سیٹ تیار کر رہا ہے، جس کا مقصد اینڈرائیڈ اسمارٹ فونز میں موجود جدید امیجنگ ٹیکنالوجی کا مقابلہ کرنا ہے۔ یہ فیچرز ایپل کے ‘Apple Intelligence’ فریم ورک کا حصہ ہوں گے۔
ٹیکنالوجی تجزیہ کار مارک گرمن کے مطابق یہ نئے ٹولز iOS 27 کے ساتھ ساتھ iPadOS 27 اور macOS 27 میں بھی متعارف کرائے جائیں گے۔ ان کی خاص بات یہ ہوگی کہ یہ مکمل طور پر ڈیوائس پر ہی AI پروسیسنگ کے ذریعے کام کریں گے جس سے تصاویر کی ایڈیٹنگ چند سیکنڈز میں ممکن ہوگی اور ڈیٹا کو کلاؤڈ پر بھیجنے کی ضرورت نہیں رہے گی۔
یہ بھی پڑھیں: اے آئی چیٹ بوٹ کلاڈ صارفین کے پاسپورٹ مانگنے لگا، وجہ کیا ہے؟
ذرائع کے مطابق فوٹو ایپ میں ‘Apple Intelligence Tools’ کے نام سے ایک نیا سیکشن شامل کیا جائے گا جس میں اہم فیچرز جیسے Enhance، Extend، Reframe اور Clean Up شامل ہوں گے۔ Enhance فیچر تصاویر کی روشنی، رنگوں اور مجموعی معیار کو خودکار طور پر بہتر بنائے گا، جبکہ Extend فیچر جنریٹو AI کے ذریعے تصویر کو اس کی اصل حدود سے باہر تک بڑھانے کی صلاحیت فراہم کرے گا۔ اسی طرح Reframe فیچر اسپیشل (3D) تصاویر کے زاویے اور فریم کو ایڈجسٹ کرنے کی سہولت دے گا جبکہ Clean Up ٹول تصاویر سے ناپسندیدہ اشیاء کو زیادہ مؤثر انداز میں ہٹانے کے لیے استعمال ہوگا۔
یہ پیش رفت ایسے وقت میں سامنے آ رہی ہے جب گوگل اور سام سنگ پہلے ہی اپنے ڈیوائسز میں جدید AI فوٹو ایڈیٹنگ فیچرز متعارف کرا چکے ہیں، جن میں ‘Magic Eraser’ اور جنریٹو امیج ایکسپینشن جیسے ٹولز شامل ہیں۔ اس صورتحال میں ایپل بھی اپنے صارفین کو بہتر اور زیادہ جدید تجربہ فراہم کرنے کی کوشش کر رہا ہے۔
یہ بھی پڑھیں: ایپل کا بڑا فیصلہ، آئی فون 18 مرحلہ وار لانچ ہوگا
رپورٹس کے مطابق اگرچہ ان فیچرز کی تیاری جاری ہے تاہم کچھ خصوصیات خاص طور پر Extend اور Reframe ابھی تک مکمل طور پر مستحکم کارکردگی نہیں دکھا رہیں۔ اس کے باوجود ایپل کے پاس انہیں بہتر بنانے کے لیے کافی وقت موجود ہے کیونکہ یہ فیچرز ابھی آفیشل ریلیز کے مرحلے تک نہیں پہنچے۔
یہ بھی واضح نہیں کہ آیا ان نئے AI فیچرز میں گوگل کے ماڈلز کا کوئی کردار ہوگا یا نہیں، تاہم دونوں کمپنیوں کے درمیان جاری تعاون کے باعث اس امکان کو مکمل طور پر رد نہیں کیا جا سکتا، جس کے اثرات مستقبل میں سری (Siri) کی بہتری کی صورت میں بھی دیکھے جا سکتے ہیں۔
