وفاقی وزیر اطلاعات و نشریات عطا اللہ تارڑ نے خیرپور سندھ سے تعلق رکھنے والے تعلیم یافتہ نوجوان اظہر میمن سے ملاقات کی اور انہیں ملازمت فراہم کرنے کی یقین دہانی کرائی ہے۔
طا تارڑ نے سماجی رابطے کی ویب سائٹ ایکس پر ملاقات کی ایک ویڈیو بھی شیئر کی، جس میں انہوں نے اظہر میمن کو اپنی نشست پر بٹھایا۔ اس موقع پر جذباتی مناظر دیکھنے میں آئے اور نوجوان اپنے احساسات پر قابو نہ رکھ سکا۔ ویڈیو میں وہ جذباتی ہوتے ہوئے کہتا ہے کہ یہ لمحات اس کے لیے انتہائی خاص ہیں۔
خیر پور سندھ سے تعلق رکھنے والے انتہائی قابل اور اعلیٰ تعلیم یافتہ نوجوان اظہر میمن سے ملاقات ایک بے حد جذباتی لمحہ تھا۔ گزشتہ دنوں اُن کی ایک ویڈیو سوشل میڈیا پر وائرل ہوئی، جس میں وہ اپنے ماضی سے لے کر آج تک کے مشکل حالات کی کہانی بیان کر رہے تھے، اُنہوں نے کراچی یونیورسٹی سے… pic.twitter.com/vF04LCKNTd
— Attaullah Tarar (@TararAttaullah) April 29, 2026
اپنے پیغام میں عطا تارڑ نے لکھا کہ اظہر میمن سے ملاقات ایک نہایت جذباتی اور متاثر کن لمحہ تھا۔ ان کے مطابق چند روز قبل اظہر میمن کی ایک ویڈیو سوشل میڈیا پر وائرل ہوئی تھی، جس میں انہوں نے اپنی زندگی کے مشکل حالات اور جدوجہد کا احوال بیان کیا تھا۔ اظہر میمن نے کراچی یونیورسٹی سے ایم بی اے کی ڈگری حاصل کر رکھی ہے۔
وفاقی وزیر نے مزید بتایا کہ انہوں نے اظہر میمن کو اسلام آباد مدعو کیا، ان کی حوصلہ افزائی کی اور ان کے لیے روزگار کے مناسب بندوبست کی یقین دہانی کروائی۔
سوشل میڈیا پر صارفین کی جانب سے عطا تارڑ کے اس اقدام کو سراہا جا رہا ہے تاہم بعض افراد نے افسوس کا اظہار بھی کیا ہے کہ 2003 میں آئی بی اے کراچی سے ایم بی اے کرنے کے باوجود اظہر میمن کو سخت حالات کا سامنا کرنا پڑا جبکہ کئی صارفین نے سوال اٹھایا ہے کہ کیا سندھ حکومت کو ایسے قابل اور ہونہار نوجوانوں کی قدر و ضرورت نہیں ہے۔
