کراچی میں وفاقی تحقیقاتی ادارے (ایف آئی اے) کے کارپوریٹ کرائم سرکل نے غیر قانونی غیر ملکی کرنسی کے کاروبار کے خلاف بڑی کارروائی کرتے ہوئے ایک ملزم کو گرفتار کر لیا ہے۔ کارروائی ڈائریکٹر کراچی زون کی ہدایات اور ڈپٹی ڈائریکٹر سی سی سی کی نگرانی میں عمل میں لائی گئی۔
ایف آئی اے کی کارروائی، پاکستانیوں کو غیرقانونی طریقے سے لیبیا بھیجنے والا انسانی اسمگلر گرفتار
ترجمان ایف آئی اے کے مطابق ٹیم نے کراچی کے علاقے ایٹریئم ٹریفک سگنل، بینک الفلاح کے قریب چھاپہ مار کارروائی کے دوران ملزم عبدالقیوم ولد عبدالغفور کو حراست میں لیا۔ ملزم پر الزام ہے کہ وہ غیر قانونی طور پر ایرانی اور دیگر غیر ملکی کرنسی کی خرید و فروخت میں ملوث تھا۔
کارروائی کے دوران ملزم کے قبضے سے تقریباً 7 ارب ایرانی ریال اور ایک موبائل فون برآمد کیا گیا، جس سے غیر قانونی کرنسی لین دین کے اہم شواہد بھی حاصل ہوئے ہیں۔ ابتدائی تفتیش کے دوران ملزم نے بلیک مارکیٹ میں کرنسی کے غیر قانونی کاروبار کا اعتراف بھی کیا ہے۔
ایف آئی اے کے مطابق ملزم روزانہ کی بنیاد پر بڑی مالیت کے غیر قانونی مالی لین دین میں ملوث رہا ہے۔ گرفتار ملزم کو برآمد شدہ کرنسی اور شواہد سمیت ایف آئی اے کارپوریٹ کرائم سرکل تھانے منتقل کر دیا گیا ہے جہاں مزید تفتیش جاری ہے۔
ترجمان نے بتایا کہ ملزم کے خلاف مقدمہ درج کیا جا رہا ہے جبکہ اس نیٹ ورک میں ملوث دیگر عناصر کی گرفتاری کے لیے بھی کارروائیاں جاری ہیں۔
ایف آئی اے نے واضح کیا ہے کہ غیر قانونی کرنسی کے کاروبار میں ملوث عناصر کے خلاف کریک ڈاؤن مزید سخت کیا جا رہا ہے تاکہ ملک میں مالیاتی نظام کو غیر قانونی سرگرمیوں سے محفوظ رکھا جا سکے۔
