عفت عمر نے اپنے مالی حالات اور ذاتی زندگی کے چیلنجز پر کھل کر بات کرتے ہوئے کہا ہے کہ انہوں نے نہایت سادہ اور مشکل پس منظر سے اٹھ کر شوبز میں مقام بنایا۔
ایک حالیہ پوڈکاسٹ میں گفتگو کرتے ہوئے انہوں نے بتایا کہ ان کا تعلق ایک کمزور مالی حالات والے گھرانے سے تھا، تاہم اس کے باوجود انہیں اچھے تعلیمی ادارے میں پڑھنے کا موقع ملا۔ ان کا کہنا تھا کہ معاشرے میں رنگت کی بنیاد پر بھی انہیں تنقید کا سامنا رہا کیونکہ ان کی گندمی رنگت کو قابلِ قبول نہیں سمجھا جاتا تھا۔
یہ بھی پڑھیے: ’اولاد کی ذمہ داری نہیں کہ وہ بڑھاپے میں آپ کا سہارا بنے‘، عفت عمر
عفت عمر کے مطابق یہی احساسِ کمتری اور حالات ان کے لیے محرک بنے اور انہوں نے ماڈلنگ کے شعبے میں قدم رکھا، جہاں ان کی کامیابی نے بہت سے لوگوں کو حیران کیا۔ انہوں نے کہا کہ اس دور میں یہ تصور عام نہیں تھا کہ گہری رنگت رکھنے والی لڑکی بھی ایک کامیاب ماڈل بن سکتی ہے۔
انہوں نے اپنی ذاتی زندگی کے حوالے سے بتایا کہ شادی کے وقت بھی لوگوں نے ان کے رشتے کے بارے میں منفی قیاس آرائیاں کیں اور یہاں تک کہا گیا کہ یہ رشتہ زیادہ عرصہ نہیں چل سکے گا، تاہم انہوں نے ان تمام باتوں کو غلط ثابت کیا۔
عفت عمر نے کہا کہ ان کی زندگی کا سفر آسان نہیں تھا، لیکن مسلسل محنت اور عزم کے ذریعے انہوں نے نہ صرف مشکلات کا سامنا کیا بلکہ ایک مضبوط مقام بھی حاصل کیا۔ ان کے مطابق ان کی کامیابی کچھ لوگوں کے لیے حیران کن تھی جبکہ بعض افراد اسے قبول نہیں کر سکے۔
یاد رہے کہ عفت عمر نے کمزور اسکرپٹس اور غیر معیاری کرداروں کے باعث ڈرامہ انڈسٹری سے وقتی وقفہ لے رکھا ہے۔
