ایپل نے اپنی حالیہ مالی سہ ماہی کے نتائج میں ایک اور ریکارڈ ساز کارکردگی کا اعلان کرتے ہوئے بتایا ہے کہ آئی فون 17 سیریز کمپنی کی تاریخ کی سب سے زیادہ مقبول اسمارٹ فون سیریز بن گئی ہے۔
کمپنی کے مطابق اس سہ ماہی کے دوران تمام مصنوعات کی فروخت میں نمایاں اضافہ دیکھنے میں آیا تاہم آئی فون کی فروخت نے اس کامیابی میں مرکزی کردار ادا کیا۔ آئی فون 17 فیملی کی غیر معمولی کارکردگی پہلے ہی توجہ کا مرکز بنی ہوئی تھی لیکن اب ایپل نے باضابطہ طور پر اس کی مقبولیت کے نئے سنگِ میل تک پہنچنے کی تصدیق کر دی ہے۔
یہ بھی پڑھیں: ایپل نے فولڈ ایبل آئی فون کی لانچنگ کیوں مؤخر کی؟
ایپل کے چیف فنانشل آفیسر کیون پریکھ نے برطانوی جریدے فنانشل ٹائمز سے گفتگو کرتے ہوئے کہا کہ ’آئی فون 17 فیملی ہماری تاریخ کی سب سے زیادہ مقبول لائن اپ بن چکی ہے‘۔
کمپنی کی جانب سے اس بیان کی مزید وضاحت فراہم نہیں کی گئی جس کے باعث یہ واضح نہیں ہو سکا کہ آیا یہ ایپل کی اب تک کی سب سے زیادہ فروخت ہونے والی آئی فون سیریز بھی ہے یا نہیں۔ تاہم ماہرین کا خیال ہے کہ اس بیان سے اسی جانب اشارہ ملتا ہے جبکہ مزید تفصیلات آئندہ مالیاتی بریفنگ میں سامنے آ سکتی ہیں۔
یہ بھی پڑھیں: ایپل کی ابتدائی 2026 لائن اپ لیک، بجٹ آئی فون سمیت کیا کچھ متوقع؟
کیون پریکھ کے مطابق ایپل کو یہ بھی یقین ہے کہ اس نے مذکورہ سہ ماہی کے دوران عالمی مارکیٹ میں اپنا حصہ بڑھایا ہے جس سے ظاہر ہوتا ہے کہ آئی فون کی طلب نے اینڈرائیڈ پر مبنی حریف ڈیوائسز کو پیچھے چھوڑ دیا ہے۔
ماہرین کے مطابق اگرچہ آئی فون 17، آئی فون 17 پرو اور آئی فون 17 پرو میکس کو زیادہ توجہ حاصل رہی تاہم اس سیریز کی مجموعی کامیابی میں آئی فون ایئر کا کردار بھی اہم رہا ہے چاہے یہ ماڈل ابتدائی توقعات پر مکمل طور پر پورا نہ اتر سکا ہو۔
