گوادر پورٹ پر مئی 2026 کا پہلا ٹرانس شپمنٹ کارگو جہاز ایم وی شو لانگ لنگر انداز ہوگیا ہے، جو اس ماہ گوادر پورٹ پر آنے والا پہلا بڑا جہاز قرار دیا جا رہا ہے۔
میڈیا کوآرڈینیٹر کے مطابق جہاز میں 16 ہزار 77 میٹرک ٹن ٹرانس شپمنٹ کارگو موجود ہے، جس میں 13 ہزار سے زیادہ پیکجز پر مشتمل چینی ساختہ صنعتی آلات اور پائپس شامل ہیں۔
یہ سامان اصل میں کویت کے لیے روانہ کیا گیا تھا تاہم آبنائے ہرمز میں جاری بحری صورتحال کے باعث اسے گوادر منتقل کر دیا گیا۔
گوادر پورٹ اتھارٹی کے چیئرمین نورالحق بلوچ کے مطابق اپریل 2026 کے دوران گوادر پورٹ پر 4 ٹرانس شپمنٹ جہازوں کی آمد ریکارڈ کی گئی تھی، جو اس بات کا ثبوت ہے کہ علاقائی سطح پر متبادل تجارتی راستوں کی تلاش میں گوادر کی اہمیت بڑھ رہی ہے۔
انہوں نے مزید بتایا کہ ڈائیورٹ ہونے والے جہازوں کے لیے برتھنگ، کارگو ہینڈلنگ اور دستاویزی عمل کو مؤثر انداز میں مکمل کیا جا رہا ہے، جس سے پورٹ کی آپریشنل تیاری اور عالمی تجارت میں اس کا کردار مزید مستحکم ہو رہا ہے۔
یہ پیشرفت گوادر پورٹ کو بحیرہ عرب میں ایک اہم ٹرانس شپمنٹ حب کے طور پر ابھار رہی ہے، جو خلیجی اور علاقائی منڈیوں کے لیے ایک محفوظ اور متبادل تجارتی راستہ فراہم کرتا ہے۔
