عطا تارڑ سے ملاقات کے بعد خیرپور کے شہری اظہر میمن کی پی ٹی وی میں ملازمت، نئی ویڈیو بھی سامنے آگئی

وفاقی وزیر اطلاعات و نشریات عطاء اللہ تارڑ نے سندھ کے ضلع خیرپور سے تعلق رکھنے والے تعلیم یافتہ نوجوان اظہر میمن کو پاکستان ٹیلی وژن کراچی میں بطور ریسرچر ملازمت فراہم کر دی ہے۔

عطاتارڑ صاحب نے اپنا وعدہ پورا کردیا ہے،اطہر میمن جو IBA سے پڑھے ہیں،انہیں پی ٹی وی کراچی میں بطور ریسرچر جاب لیٹر دے دیا گیا ہے،ان کی ویڈیو بنانے والے انفلونسر کو بھی بطور ڈیجیٹل کوآرڈینیٹر نوکری دے دی گئی،ویلڈن تارڑ صاحبpic.twitter.com/A2Bc1vpKGA

— Pervaiz Sandhila (@chsandhilaa) May 6, 2026

وزیر اطلاعات کی جانب سے کیے گئے اس اقدام پر سوشل میڈیا صارفین کی جانب سے ملا جلا ردعمل سامنے آیا ہے۔ ایک جانب صارفین نوجوان کی حوصلہ افزائی اور حکومتی اقدام کو سراہ رہے ہیں تو دوسری جانب بعض حلقوں کی جانب سے تنقید بھی کی جا رہی ہے کہ آیا ملازمت کے حصول کے لیے سوشل میڈیا پر اس نوعیت کی توجہ حاصل کرنا ضروری بنتا جا رہا ہے۔

اس شخص کے صاحب روزگار ہونے پر خوشی ہوئی لیکن کیا محض سوشل میڈیائی وائرل پن اب اسٹریٹجی ہے ؟ جسے جاب چاہیے ہو وہ سوشل میڈیا پر کوئی اسٹنٹ کرے ؟ https://t.co/KVDBrDw53T

— khurram Mushtaq (@khurramchaudry_) May 6, 2026

ایک اور صارف نے کہا کہ ایسے لاکھوں نوجوان ہیں پاکستان میں جو شاید ترس رہے ہیں کہ ان کو سپورٹ کیا جائے وہ قابل بھی ہیں۔

سندھیلا صاحب ایسے لاکھوں نوجوان ہیں پاکستان میں جو شاید ترس رہے ہیں کہ انکو سپورٹ کیا جائے وہ قابل بھی ہیں

— Awais Riaz Sheikh (@Awais046) May 6, 2026

عابد نامی صارف کا کہنا تھا کہ ایک پڑھے لکھے محنتی انسان کو جاب دے کر اس کی پذیرائی کی گئی ایک بہترین اور انسانیت دوست عمل ہے جسکی ستائش کی جانی چاہئے۔

ایک پڑھے لکھے محنتی انسان کو جاب دے کر اس کی پذیرائی کی گئی ایک بہترین اور انسانیت دوست عمل ہے جسکی ستائش کی جانی چاہئے

— Abid Dhariwal (@a__bd26) May 6, 2026

واضح رہے کہ عطاء اللہ تارڑ نے سماجی رابطے کی ویب سائٹ ایکس  پر ملاقات کی ایک ویڈیو بھی شیئر کی جس میں انہوں نے اظہر میمن کو اپنی نشست پر بٹھایا۔ ویڈیو میں جذباتی مناظر دیکھنے میں آئے جہاں نوجوان اپنے جذبات پر قابو نہ رکھ سکا اور کہا کہ یہ لمحات اس کے لیے انتہائی خاص ہیں۔

میڈیا سے گفتگو کرتے ہوئے اظہر میمن کا کہنا تھا کہ وفاقی وزیر نے انہیں عزت و احترام کے ساتھ اسلام آباد مدعو کیا جہاں انہیں پہلی مرتبہ ہوائی جہاز میں سفر کرنے کا موقع ملا۔ ان کے مطابق ملاقات کے دوران انہیں ایک موبائل فون بطور تحفہ بھی دیا گیا جبکہ ملازمت فراہم کیے جانے کی خوشخبری بھی سنائی گئی تھی۔