امریکا کے معروف میڈیا صنعت کار اور عالمی خبررساں ادارے سی این این کے بانی ٹیڈ ٹرنر 87 برس کی عمر میں انتقال کر گئے۔ ادارے نے بدھ کے روز ان کے انتقال کی تصدیق کی، جس کے بعد دنیا بھر میں میڈیا حلقوں نے انہیں خراجِ عقیدت پیش کیا۔
ٹیڈ ٹرنر نے 1980 میں سی این این قائم کر کے ٹیلی وژن صحافت میں انقلاب برپا کیا۔ یہ امریکا کا پہلا 24 گھنٹے خبروں کا چینل تھا، جس نے مسلسل براہِ راست نشریات کا تصور متعارف کرایا۔ ان کے اس اقدام نے عالمی میڈیا کا نقشہ بدل دیا اور خبر رسانی کو ہر لمحہ جاری رکھنے کی روایت کو جنم دیا۔
یہ بھی پڑھیے: امریکا اور ایران معاہدے کے قریب، جنگ کے بعد سمجھوتہ ناگزیر ہے، سی این این کا دعویٰ
سی این این کو عالمی شہرت 1990-91 کی خلیج جنگ کی کوریج سے ملی، جب اس کے نمائندوں نے میدانِ جنگ سے براہِ راست رپورٹس نشر کیں۔ بعد ازاں سوویت یونین کا انہدام اور تیانانمن اسکوائر احتجاج جیسے اہم واقعات کی کوریج نے بھی ادارے کی ساکھ کو مزید مضبوط کیا۔
ٹیڈ ٹرنر طویل عرصے سے لیوی باڈی ڈیمنشیا نامی بیماری میں مبتلا تھے، جو ایک اعصابی عارضہ ہے۔ ان کی شخصیت میں کاروباری بصیرت کے ساتھ ساتھ فلاحی جذبہ بھی نمایاں تھا، اور انہوں نے کئی سماجی منصوبوں میں بڑھ چڑھ کر حصہ لیا۔
یہ بھی پڑھیے: پینٹاگون سربراہ کی سی این این پر تنقید کی، ٹرمپ کے حلیف کو ادارہ خریدنے کا مشورہ
1938 میں امریکی ریاست اوہائیو کے شہر سن سنناٹی میں پیدا ہونے والے ٹرنر نے اپنے والد کے انتقال کے بعد خاندانی کاروبار سنبھالا اور اسے وسعت دی۔ بعد ازاں انہوں نے ریڈیو اور ٹی وی کے شعبے میں قدم رکھا اور ایک چھوٹے اسٹیشن کو خرید کر میڈیا سلطنت کی بنیاد رکھی۔
ان کی کامیابی نے دنیا بھر میں 24 گھنٹے نیوز چینلز کے قیام کی راہ ہموار کی، جن میں فاکس نیوز اور دیگر بین الاقوامی نیٹ ورکس شامل ہیں۔ ٹیڈ ٹرنر کو جدید نشریاتی صحافت کا بانی تصور کیا جاتا ہے۔
