بنگلہ دیش کے وزیراعظم طارق رحمان نے پولیس اہلکاروں پر زور دیا ہے کہ وہ عوام کے جان و مال کے تحفظ اور ملک میں امن و امان کے قیام کے لیے پوری دیانت داری اور صلاحیت کے ساتھ اپنی ذمہ داریاں ادا کریں، جبکہ جمہوری اقدار کے تحفظ اور آمریت کے دوبارہ ابھرنے کی روک تھام کو بھی یقینی بنائیں۔
یہ بھی پڑھیں:بنگلہ دیش آرمی نے پاک فوج سے متعلق بھارتی میڈیا کی بے بنیاد رپورٹ مسترد کردی
ڈھاکہ کے راجرباغ پولیس لائنز میں پولیس ویک 2026 کی افتتاحی تقریب سے خطاب کرتے ہوئے وزیراعظم نے کہا کہ عوام کا تحفظ اور امن و امان کا قیام بڑی حد تک پولیس کی پیشہ ورانہ صلاحیت اور لگن پر منحصر ہے۔ تقریب میں اعلیٰ حکام، پولیس افسران اور ریپڈ ایکشن بٹالین (آر اے بی) کے اہلکاروں نے شرکت کی۔
انہوں نے کہا کہ حکومت توقع رکھتی ہے کہ پولیس اپنے تمام وسائل اور صلاحیتوں کو بروئے کار لاتے ہوئے شہریوں کی سلامتی کو یقینی بنائے گی۔ وزیراعظم نے زور دیا کہ قانون نافذ کرنے والے ادارے کبھی بھی ملک یا عوام کے مفاد کے خلاف استعمال نہ ہوں۔
طارق رحمان نے کہا کہ موجودہ حکومت 2024 کی عوامی تحریک کے بعد جمہوریت پسند شہریوں کی امنگوں کی نمائندگی کر رہی ہے، اور اب عوام امن، انصاف اور تحفظ کی توقع رکھتے ہیں۔
یہ بھی پڑھیں:پاکستان اور بنگلہ دیش کے درمیان منشیات کے خلاف تعاون کا معاہدہ
انہوں نے 1971 کی آزادی کی جنگ میں شہید ہونے والے پولیس اہلکاروں کو خراجِ عقیدت پیش کیا اور راجرباغ پولیس لائنز پر 25 مارچ 1971 کو ہونے والے حملے کا ذکر کیا۔ انہوں نے کہا کہ اس وقت بنگالی پولیس اہلکاروں کی مزاحمت ملکی تاریخ کا ایک اہم باب ہے۔
وزیراعظم نے 13ویں قومی پارلیمانی انتخابات کے دوران پولیس کے کردار کو سراہتے ہوئے کہا کہ قانون و نظم برقرار رکھنے میں پولیس نے پیشہ ورانہ مہارت کا مظاہرہ کیا۔
انہوں نے مزید کہا کہ بنگلہ دیش پولیس اقوام متحدہ کے امن مشنز میں بھی نمایاں خدمات انجام دے رہی ہے اور دنیا بھر میں اس کی پیشہ ورانہ صلاحیتوں کو سراہا جا رہا ہے۔
تقریب کے اختتام پر وزیراعظم نے پولیس اور ریپڈ ایکشن بٹالین کے اہلکاروں کو پریڈ میں شاندار کارکردگی پر مبارکباد دی اور پولیس ویک 2026 کی کامیابی کے لیے نیک خواہشات کا اظہار کیا۔
