بنگلہ دیش کی وزارتِ سول ایوی ایشن اینڈ ٹورازم نے غیر رجسٹرڈ اور ایکسپائرڈ ٹریول ایجنسیوں کے خلاف فوری عوامی وارننگ جاری کرتے ہوئے شہریوں کو خبردار کیا ہے کہ ایسی ایجنسیاں انسانی اسمگلنگ اور فراڈ جیسے سنگین جرائم میں ملوث ہو سکتی ہیں۔
یہ بھی پڑھیں:بنگلہ دیش میں دہشتگردی کا خطرہ، ایئرپورٹس سمیت اہم مقامات پر سیکیورٹی سخت کردی گئی
ڈھاکہ سے موصولہ اطلاعات کے مطابق وزارتِ سول ایوی ایشن اینڈ ٹورازم نے اتوار کے روز جاری کردہ بیان میں عوام کو متنبہ کیا ہے کہ بغیر رجسٹریشن یا مدت ختم ہونے کے باوجود کام کرنے والی ٹریول ایجنسیوں سے مکمل اجتناب کیا جائے۔
بیان میں کہا گیا کہ حالیہ رپورٹس میں ایک مقامی ایجنسی کے روس بھیجے گئے بنگلہ دیشی شہریوں سے متعلق انسانی اسمگلنگ کے الزامات سامنے آئے ہیں، جس پر حکام نے فوری نوٹس لیا ہے۔
وزارت نے واضح کیا کہ میڈیا میں جس ادارے کا ذکر آیا ہے وہ ’ڈریم ہوم ٹریولز‘ ہے، جبکہ ’ڈریم ہوم ٹریولز اینڈ ٹورز لمیٹڈ‘ سے اس کا کوئی تعلق نہیں، تاکہ عوام میں پیدا ہونے والی غلط فہمی دور کی جا سکے۔
یہ بھی پڑھیں:بنگلہ دیش: بوگرا ایئرپورٹ کو کمرشل حب بنانے کا منصوبہ، 30 ارب ٹکا مختص
سرکاری تحقیق کے مطابق جنوری 2025 کی ایک رپورٹ کے بعد شروع کی گئی جانچ میں یہ بات سامنے آئی کہ مذکورہ ایجنسی کا لائسنس 3 اپریل 2021 سے ایکسپائر ہو چکا تھا، تاہم اس کے باوجود اس کا آپریشن جاری رہا۔
حکام نے کہا کہ ٹریول ایجنسی ایکٹ 2013 کے تحت تمام ایجنسیوں کی رجسٹریشن اور لائسنس کی بروقت تجدید لازمی ہے، اور بغیر رجسٹریشن کام کرنا قانون کی خلاف ورزی ہے۔
وزارت نے شہریوں کو سختی سے ہدایت کی ہے کہ وہ کسی بھی ٹریول ایجنسی سے ٹکٹ، ٹور پیکج یا مالی لین دین سے قبل اس کی رجسٹریشن کی تصدیق لازمی کریں، تاکہ فراڈ اور مالی نقصان سے بچا جا سکے۔
