اسٹاک ایکسچینج میں جمعرات کو کاروبار کے آغاز پر سرمایہ کاروں کی جانب سے بھرپور خریداری دیکھی گئی، جہاں انڈیکس میں ابتدائی لمحات کے دوران تقریباً ایک ہزار پوائنٹس کا اضافہ ریکارڈ کیا گیا۔
صبح 9 بج کر 35 منٹ تک بینچ مارک کے ایس ای 100 انڈیکس 998.01 پوائنٹس یعنی 0.60 فیصد اضافے کے ساتھ 168,449.14 پوائنٹس کی سطح پر ٹریڈ کر رہا تھا۔
یہ بھی پڑھیں: سرمایہ کاروں کا اعتماد اسٹاک ایکسچینج میں بہتری کا باعث، کیا معیشت مستحکم ہورہی ہے؟
مارکیٹ میں خریداری کا رجحان خاص طور پر آٹو موبائل اسمبلرز، سیمنٹ، کمرشل بینکس، آئل اینڈ گیس ایکسپلوریشن کمپنیوں، آئل مارکیٹنگ کمپنیوں، پاور جنریشن اور ریفائنری سیکٹرز میں نمایاں رہا۔
اٹک ریفائنری لمیٹڈ، حب پاور کمپنی، ماری انرجیز، آئل اینڈ گیس ڈیولپمنٹ کمپنی، پاکستان پیٹرولیم لمیٹڈ، حبیب بینک، یونائیٹڈ بینک، مسلم کمرشل بینک اور میزان بینک سمیت انڈیکس پر اثرانداز ہونے والے بڑی کمپنیوں کے شیئرز مثبت زون میں ٹریڈ کرتے رہے۔
PSX Opened Positive 🚀
☀️ KSE 100 opened positive by +969.88 points this morning. Current index is at 168,421.02 points (9:45 AM) pic.twitter.com/BL8zYvpetJ— Investify Pakistan (@investifypk) May 14, 2026
گزشتہ روز یعنی بدھ کو اسٹاک ایکسچینج میں مندی کا رجحان غالب رہا تھا، جہاں سرمایہ کاروں نے جاری سفارتی مذاکرات میں خاطر خواہ پیش رفت نہ ہونے اور امریکا و ایران کے درمیان صورتحال سے متعلق غیر یقینی کیفیت کے باعث محتاط حکمت عملی اختیار کی تھی۔
علاوہ ازیں عالمی سطح پر تیل کی بلند قیمتوں نے بھی مارکیٹ کے جذبات کو متاثر کیا، جس کے نتیجے میں اہم شیئرز میں فروخت کا دباؤ دیکھا گیا۔
مزید پڑھیں: اسٹاک مارکیٹ شدید دباؤ میں، بینچ مارک انڈیکس میں نمایاں کمی
بدھ کو کے ایس ای 100 انڈیکس 1,465.09 پوائنٹس یعنی 0.87 فیصد کمی کے بعد 167,451.14 پوائنٹس پر بند ہوا تھا۔
دوسری جانب عالمی اسٹاک مارکیٹوں میں بھی جمعرات کو مثبت رجحان دیکھا گیا۔ مصنوعی ذہانت سے متعلق بڑھتے ہوئے رجحان کے باعث جنوبی کوریا کی کمپنی ایس کے ہائینکس کے شیئرز میں نمایاں اضافہ ہوا۔
عالمی سرمایہ کاروں کی توجہ امریکی صدر ڈونلڈ ٹرمپ اور چینی صدر شی جن پنگ کے درمیان اہم ملاقات پر مرکوز رہی۔
عالمی سطح پر جاپان کے نکی انڈیکس نے نئی بلند ترین سطح حاصل کی، جبکہ ایشیا پیسیفک شیئرز انڈیکس بھی ریکارڈ سطح کے قریب رہا۔
تاہم ماہرین نے خبردار کیا ہے کہ مشرق وسطیٰ میں جاری کشیدگی اور تیل کی بلند قیمتیں مستقبل میں دوبارہ مہنگائی کے خدشات کو بڑھا سکتی ہیں۔
