نائب وزیراعظم و وزیر خارجہ سینیٹر محمد اسحاق ڈار کی زیر صدارت آئندہ مالی سال کے بجٹ کے لیے ٹیکس پالیسی تجاویز پر غور کے لیے قائم کردہ کمیٹی کا اہم اجلاس ہوا، جس میں محصولات میں اضافہ، ٹیکس نیٹ میں توسیع اور سرمایہ کاری کے فروغ کے لیے متوازن اور ترقیاتی اقدامات پر زور دیا گیا۔
اسلام آباد میں ہونے والے اجلاس کی صدارت اسحاق ڈار نے کی۔ اجلاس میں وزیراعظم کی ہدایت پر قائم کمیٹی نے مختلف ٹیکس تجاویز پر پیش رفت کا جائزہ لیا۔
یہ بھی پڑھیں:غیر رسمی سیکٹر کو ٹیکس نیٹ میں لانے، بجٹ پالیسی تجاویز کے جائزے کے لیے اہم اجلاس
اجلاس میں اس بات پر اتفاق کیا گیا کہ آئندہ بجٹ میں ایسے متوازن اور ترقیاتی اقدامات شامل کیے جائیں گے جو نہ صرف ٹیکس نیٹ کو وسیع کریں بلکہ ملکی معیشت کو بھی مستحکم بنائیں۔ کمیٹی نے اس بات پر زور دیا کہ محصولات میں اضافہ کے ساتھ ساتھ دیانت دار ٹیکس دہندگان پر اضافی بوجھ نہ ڈالا جائے۔
اجلاس میں وزیر برائے اقتصادی امور، وزیر مملکت برائے خزانہ و ریلوے، وزیراعظم کے معاون خصوصی طارق باجوہ، سیکریٹری خزانہ، چیئرمین ایف بی آر اور متعلقہ وزارتوں کے سینئر حکام نے شرکت کی۔
شرکا نے اس عزم کا اظہار کیا کہ حکومت معاشی ترقی، سرمایہ کاری کے فروغ اور ریونیو جنریشن کے لیے مربوط اور پائیدار حکمت عملی پر عمل پیرا رہے گی۔
