اسلام آباد پولیس نے عیدالاضحیٰ کے موقع پر مویشی منڈیوں میں بیوپاریوں اور خریداروں کے تحفظ کو یقینی بنانے کے لیے جامع سیکیورٹی پلان تشکیل دے دیا ہے۔ سیکیورٹی انتظامات کے تحت 1500 سے زائد پولیس افسران اور اہلکار مختلف ڈیوٹیاں انجام دیں گے جبکہ غیر قانونی مویشی منڈیاں قائم کرنے والوں کے خلاف بھی سخت کارروائی کا فیصلہ کیا گیا ہے۔
ترجمان اسلام آباد پولیس کے مطابق وفاقی دارالحکومت میں قائم مویشی منڈیوں کی سیکیورٹی اور جرائم کی روک تھام کے لیے خصوصی سیکیورٹی پلان مرتب کر لیا گیا ہے۔ اس حوالے سے 1500 سے زائد پولیس افسران اور اہلکار تعینات کیے جائیں گے جو مختلف مقامات پر فرائض سرانجام دیں گے۔
ڈی آئی جی اسلام آباد محمد جواد طارق نے کہا ہے کہ مویشی منڈیوں میں شہریوں کے جان و مال کے تحفظ اور امن و امان کی صورتحال برقرار رکھنا پولیس کی اولین ترجیح ہے۔ انہوں نے ہدایت کی کہ تمام پٹرولنگ یونٹس، کیپیٹل پٹرول فورس اور متعلقہ تھانوں کی موبائل ٹیمیں ایمرجنسی ریسپانس کو یقینی بنائیں تاکہ کسی بھی ناخوشگوار واقعے سے فوری طور پر نمٹا جا سکے۔
انہوں نے واضح کیا کہ ضلعی انتظامیہ کی جانب سے منظور شدہ مقامات کے علاوہ کہیں بھی مویشی منڈی لگانے کی اجازت نہیں ہوگی اور خلاف ورزی کرنے والوں کے خلاف قانونی کارروائی عمل میں لائی جائے گی۔
ڈی آئی جی اسلام آباد کے مطابق ٹریفک کی روانی برقرار رکھنے کے لیے ٹریفک پولیس کے افسران بھی خصوصی ڈیوٹیاں انجام دیں گے جبکہ شہریوں کو ہدایت کی گئی ہے کہ وہ اپنی گاڑیاں صرف مختص کردہ پارکنگ مقامات پر ہی کھڑی کریں تاکہ ٹریفک کی روانی متاثر نہ ہو۔
اسلام آباد پولیس کا کہنا ہے کہ عیدالاضحیٰ کے دوران شہریوں کو محفوظ ماحول فراہم کرنے کے لیے تمام ممکنہ اقدامات کیے جا رہے ہیں۔
